ZPM ṭhalaiin vanduaithlak an ti

Zoram Peoples' Movement (ZPM) ṭhalai chuan thuchhuah siamin, August 29, 2018-a social media-a thu post vanga Mizoram police-te'n Rodinliana Tochhawng (Apuia Tochhawng) s/o T Ngursiama, Khawzawl Darngawn Veng an man leh thubuai an siamsak chu vanduaithlak an tih thu an tarlang.

ZPM ṭhalai tarlan danin, Rodinliana Tochhawng hian social media kaltlangin Mizoram Chief Minister hnenah 'open letter' a thawn a; chumi chungchangah chuan Home Minister-in chak taka hma laa an chhui thu leh man chhuah a nih thu a sawi a; Rodinliana chu thubuai tênau siamsak nia hriat a ni.

Rodinliana Tochhawng thu ziahah huat tur a awma an hriat loh thu sawiin ZPM ṭhalai chuan, "Ram leh hnam hmangaiha veina vanga mi ṭhahnem­ngaite thu post ngaimawh tâwk lek Home Minister kan nei hi vanduai­thlak kan ti. He thu post-ah hian intih­hmingchhiatna lam hawi reng reng sawi tur a awm lo a, thu dik tak sawi hi huain, thuneihna kan hmang sual ta mai em ni tih leh, mimal zalenna hi thuneihna hmangin kan nêkchêpsak ta em ni tih hi kan zawt a ni," an ti.

ZPM ṭhalaite chuan, "Lei chim leh kawngpui chhiat chhan leh mipui harsatna danga mawhphurtu chhui chhuak thei lo, lei pawh mipui zawh chima sawi duhtute rorel dan hi a khamawm tak zet. Thu leh hla buai tam tak chhui chhuah mai theiha ngaih ti thei lo, thil fahrah têtê hneh taka chhui thei hi sorkar chak tak tih âwm tawk lekah kan ngai," an ti a; ZPM-in mipui sorkar, mi tin huapzo siam tura hma a lakna chu thláwpa ṭawiawm turin mipui an ngen a ni.