Faina kawnga inelna endik

Pachhunga University College (PUC) chuan aca­demic session kal lai ṭan tir, July thla aṭang khan December 2018 thleng awh turin an college-a depart­ment hrang hrangte faina leh thianghlimna lama inelna an buatsaih a; nimin khan endik vawi khatna neih niin, MJA general headquar­ters hruaitute'n an endik.

PUC hian department hrang hrangte chu group 23-ah ṭhenin, an enkawl tur bik hmun an ruat a; chu'ng group hrang hrangte chuan an chan ṭheuh chu a tihfai leh a cheimawi kawngah mawhphurin, an tifai ṭhin a ni. Group hrang hrangte hnathawhte chu nimin khan a vawi khatna atan MJA hruaitute'n an endik a; kum tawp lamah endik vawi hnihna neih leh tum a ni.

PUC Cleanliness & Beautification verifica­tion ṭan hmaa hun tawitê hman­ah principal Dr Tawnenga chuan, an college chuan faina leh thianghlimna lama nasa takin ṭan an la tih a sawi a, "UDPA department project hmangin solid waste management kan siam dawn a, nuai 15 kan hmuh turah nuai 9 min pe tawh. Bawlhhlawh báwm lian 100 chuang kan sem tawh, bawlhhlawh ṭawih thei leh thei lo kan thliar dawn a ni," a ti.