Mamit DC sawn chhuah phût

Mamit District Ṭhalai Pawl chuan thuchhuah siamin, Mizoram páwna Bru zinga electoral roll revision neih zawh tawh, endik fel hmaa August 23, 2018 zana a bo chu pawi an tih thu leh mak an tih thu an tarlang a; hei vang hian, Mamit DC Bhupesh Chaudhary chu a hna enkawl zo loah puhin, Mamit aṭanga sawn chhuak turin sorkar an phût tih an puang.

Mamit DṬP chuan, Mamit bawrhsap Bhupesh Chaudhary chu rang taka sawn chhuak turin Mizoram Chief Minister an ngen tih an sawi a, "A chung­ah eng harsatna pawh thleng se, Mamit DṬP mawh a ni lo ang," an ti.

MDṬP chuan, Election Commission of India (ECI)-in eng ang pawhin Mizoram páwna Bru awm­te an awmnaa electoral roll revision nei leh turin ti mah se, Mizoram sorkar chu Mizoram NGO-te leh mipuiin an duh lo a, Bru lak let tawhte chauh electoral roll revision neihpui ṭha an tih thu an sawi a; kumina MLA inthlanpui awm turah pawh, Mizoram páwna Bru transit camp-ah vote thlaktir tumna a awm a nih chuan, na taka an dodal dawn thu an puang.