September 1-ah IPPB hawng dawn

Postal department-a postmaster general (hmarchhak bial enkawltu) T Mang Min Thang chuan, an department-in bank thar an siam, India Post Payment Bank (IPPB) chu ram chhung hmun dangte rualin Mizoramah pawh September 1, 2018-ah hawn a ni dawn tih a sawi.

T Mang Min Thang hian nimin khan Aizawl Press Club-ah thuthar thehdarhtute a kâwm a; IPPB chu bank dang ang ni loin, an bank-a account hawngte chu an hnathawktute'n an inah kal chilhin an mamawhte an tihsak dawn tih sawiin, "Bank dawr duhte chuan a hmuna kal kher ngai loin, call centre-ah emaw SMS hmangin emaw an mamawh hun an hrilh ang a, a hun a lo thlenah hnathawktute'n an mamawh ang an tihsak mai dawn a ni," a ti.

IPPB hmang hian account-a pawisa dah luh, lak chhuah, bank danga pawisa thawn, bill hrang hrang online hmanga pek leh direct benefit transfer chi hrang hrang (MGNREGS hlawh lak, gas subsidy, scholarship, etc.) a lâk theih dawn tih sawiin T Mang Min chuan, "Account-a pawisa awm zat bituk siam loin, pawisa an nei tlem deuh a nih pawhin chawi a awm ve dawn lo," a ti a; account hawn leh pawisa che vel zawng zawng chu paper tel loa tih tur a nih thu a sawi.

Postal department hotute sawi danin, IPPB hi a bul ṭanna atan district paruk - Aizawl, Kolasib, Champhai, Lawngtlai, Lunglei leh Serchhip district-ahte hmun pangaah ṭheuh hawn phawt a ni dawn. Kumin chhung hian Mizorama Post Office awm zawng zawng 383 chu IPPB tih theihnaa hlan kai hman vek tum a ni.