Lungleiah RT-PCR hmang ṭan dawn ; TrueNAT-in chhim lam mamawh a phuhrûk tih sorkarin Gauhati High Court-ah a thlen
Mizoram sorkar ukil chuan January 17, 2022 khan Gauhati High Court, Aizawl Bench-ah Mizoram chhim lam district pali tan Covid-19 vei leh vei loh endikna atan TrueNAT khawl pali awm mek chu a tâwk thu a thlen. Hetih lai hian, Lunglei Tourist Lodge-a RT-PCR laboratory bun thar chu Covid-19 swab sample endik nan vawiin hian hman ṭan a ni dawn.
RT-PCR for Chhimbial ukil JC Lalnunsanga'n December 30, 2021-a hawn tawh Lungleia RT-PCR laboratory hman a la nih loh thu Gauhati High Court-a a thlen chungchangah Mizoram sorkar ukil chuan, laboratory chu ICMR-in an pawm tawh thu leh hman theih a nih tawh thu Court a hrilh.
Mizoram sorkar ukilin High Court a hrilh danin, chhim lam district palia sample test tur chu ni khatah 100 a tling ngai lo a, chuvangin, TrueNAT pali hmanga endik theih a ni. Endik tur hi 100 aia a tam chuan RT-PCR laboratory hman theih reng a ni.
Hetih lai hian, Gauhati High Court chuan January 1, 2022 aṭanga ni tin district palia swab sample endik tur lak khawm zat dik tak January 25, 2022-a thehlut turin Mizoram sorkar a hriattir.
IPR department-in ni tina Covid-19 positive report a tihchhuaha tarlan dan chuan, kumin chhungin (January 17 thleng) Lunglei district bikah chauh pawh swab sample hi RAT leh TrueNAT hmangin 100 chuang endik a ni deuh ziah a, January 2, 3 leh 10-ah erawh chuan 100 a tling lo. Sample endik zinga 90% chuang chu RAT hmanga endik a ni.
Thuthar thehdarhtute zawhna Lunglei Civil Hospital medical superintendent Dr SR Ngurchamliana'n a chhan danin, tun dinhmunah sample endikna atana hman tur teagent mamawh ang an nei tawh. National Health Mission aṭanga laboratory enchhinna tur an kawl sate bakah department-in a leite lâk khawm a, mamawh ang zela lak belh tur a ni.
Vawiin aṭangin Lunglei district-ah ni tin chawhnu dar 1 hma lama swab sample thleng hmante chu RT-PCR laboratory-ah endik a ni dawn a, chawhnu dar 1 hnu lama laboratory thlengte chu a tûkah endik tur a ni thung.