Mizoramah Omicron la hmu lo

Covid-19 thupuangtu Dr Pachuau Lalmalsawma, IDSP state nodal officer chuan, Mizoramah Covid-19 Omicron variant vei hmuh a la nih loh thu Vanglaini a hrilh.

Dr Pachuau Lalmalsawma chuan, Aizawla veng pakhatah Omicron vei an awm tawh anga social media-a thu thehdarh chu thu belhchian dâwl lo a nih thu a sawi a, "January 10, 2022 khan genome sequencing atan sample 95 thawn a ni a, heng result hi IHIP portal leh e-mail-ah hmuh tur a la awm lo. Hemi ṭuma sample thawnah hian Omicron hmuhna nia sawi veng aṭang hian sample thawn a awm lo bawk a ni," a ti.