Bru-te rawn lêt a rem tawh lo-ah ngai

NGO Coordination Committee (Joint NGO) chuan, Tripura-a Bru relief camp aṭanga Mizorama rawn lêt duh Bru-te chu an rawn kîr a rem tawh loa an ngaih thu an tarlang.

Joint NGO hi an chairman R Lalngheta, Central YMA kaihhruaiin nimin khan CYMA Committee Room-ah an ṭhukhawm a; resolution siamin, "Mizoram aṭanga anmahni duh thu ngeia Tuikuk, Tripura-a tlân thlate zingah Mizorama rawn lêt leh duh an awm thu hriat a ni a, hei hi NGO Coordination Committee chuan ṭha a ti lo a, a remchang loah kan ngai," an ti.

Ṭhutkhawmah hian Mizoram aṭanga mahni duh thua Tripura-a tlân thla Bru-te Mizoram Electoral Roll aṭanga paih chungchang sawiho a ni a; "Mizoram Electoral Roll aṭanga paih an nih thuai theihna tur leh hemi chungchanga January 16, 2020-a New Delhi-a Union Home Minister, Mizoram leh Tripura chief minister-te leh Tuikuk páwl hrang hrangte'n inremna an lo siam tawh chu tihhlawhtlin thuai a nih theih nan Mizoram Chief minister leh Home Minister sawipui ni se," an ti a, a ṭul anga hmalak zui zel an rél.

NGO Coordination Committee chuan, hun remchangah Mizoram leh Assam ramri tlawh an rél bawk.

Tarlan tawh angin, January 15, 2022-a Mizoram Electoral Roll 2022 tlangzarh tâkah Tripura relief camp-a awm Bru-te paih an ni lo a; Tripura camp-a awm Bru zinga Mizorama vote nei mi 11,772 an awm a, an zinga mi 8,885 chuan Mamit district-ah vote neiin, mi 1,979-in Kolasib district-ah leh mi 908-in Lunglei district-ah vote an nei a ni.

Election department hotute sawi danin, Mizoram Electoral Roll thar berah hian Tripura-a Bru-te paih an ni lo a, thun thar pawh an awm lo. Electoral roll aṭanga Bru-te paih tur chuan Tripura sorkarin chhawmdawlna an dawn tur ang a pek kim a, electoral roll-a an thun phawt a ngai niin an sawi.