Mizorama Covid-19 vei mek zingah Aizawl páwn lam mi 70% an awm

Indian Medical Asso­ciation (IMA), Mizoram hotute chuan nimin khan Health minister Dr R Lalthangliana chu a pisaah an kâwm a, Mizoram khaw hrang hranga Covid-19 darh meka hmalak dan tur an sawiho. IMA hotute chuan, tun dinhmunah Mizorama hripui vei 70% chu Aizawl khaw páwn lama mite an nih thu an sawi.

IMA hotute chuan, Covid-19 vei dinhmun an zir chian dan an tarlang a; kum kal ta khan Mizorama hripui vei zinga 70% chu AMC huam chhunga awm an nih laiin, tunah chuan 70% chu AMC páwn lama mi an nih tawh thu an sawi a ni.

IMA hotute chuan, “ZMC report aṭanga a lan danin, October 2021-a ZMC-a hri vei thi zinga 30% aia tlem hi AMC area páwn an ni a, November thlaa thi zingah 34% chu AMC area pawn niin, December thlaah chuan 66% a ni. January thla kal lai mekah hian 52% an ni tawh a, ZMC ni lo, DCHC leh home isolation-a thi zingah pawh Aizawl páwn lam an tam zawk tawh hle,” an ti.

Tun dinhmunah khawpui, a bikin district headquarters-te dinhmun a ṭha zawk tih sawiin, “Thingtlang khaw hrang hrangah a darh nasa hle a, hei vang hian ngaihtuahna uluk taka sên a ngai,” an ti. Doctor leh nurse awm lohna hmunahte a darh nasat avangin Aizawl aṭanga IMA member-te’n hripui veite an vil dan tur an sawiho ṭhin thu leh, a hmuna kal chilh theih lohte chu internet leh social media kaltlanga vil dan tur ruahmanna mumal siam a ṭul thu an sawi bawk.

Ṭhutkhawma an sawi ṭhenkhat
 Thingtlanga hri veite chu hlauhthawn vanga damdawi an hriat ang ang ei lo turin an duh.
 Hmai tuamna vuah ṭhat a pawimawh a, thingtlanga kum upate vil uluk a ngai.
 A ṭul chuan health worker leh ASHA-te'n thingtlanga kum upa leh natna benvawn neite zawng chhuak se, health worker leh ASHA awm lohna hmunah chuan zirtirtute leh anganwadi worker-te chhawr ṭangkai dan zawn ni se.
 Hripui veite enkawl dan tur awlsam zawka hriatthiam theih tur ruahman a, khaw tinah inzirtir ni se.
 Hripui vei zinga ngaihtuahawmte hmunpui lama rang taka thawn zung zung thei turin ruahmanna fel tak siam a ṭul.