Laloo-a'n mithiamte aia rin a neih vangin Gunda huangtauna ramah Bihar a siam - MPCC President

Mizoram Pradesh Congress Committee (MPCC) president Lalsawta chuan, Bihar chief minister hlui Laloo Prasad Yadav-a'n mithiamte aia rin zawk a neih avangin Bihar chu gunda (misual rual)-te huangtauna ramah a siam thu sawiin, Mizorama sorkar ding mek chu an sorkar zel chuan duh loh ramah Mizote an hruai luh a hlauhawm thu a sawi.

Kumin atana Congress Bhavan hawnna inkhawm nimina buatsaihah thu sawiin Lalsawta chuan, "Laloo Prasad Yadav khan lehkhathiam pui pui ring duh loin, lehkha ziak thei ngawr ngawr a ring tlat a, chuvangin, gunda ho huangtauna ramah a siam. He sorkar hi a sorkar chhunzawm zel chuan duh loh ramah min hruai lut dawnin ka hria a, a hlauhawm ka ti," a ti.

MPCC President chuan, Mizoram dinhmun chu ngaihtuahna hmangte'n ṭha lo an tih thu sawiin, "Kei pawhin ṭha ka ti lo. Mexico leh Colombia angin duh lo chung chungin misual tlem zawkte rorelna ramah kan chang mai ang tih a hlauhawm," a ti a; mi ṭhate chu ngawi tlat lo a, Mizoram tichhe thei tur do tlat turin an ṭawng chhuah a hun tawh thu a sawi.

Congress party-in sorkarna an siam a ngaih thu sawiin Lalsawta chuan, "Kan ram enkawl turin kan sorkar a ngai. Kan ramin a mamawh chu ram mipui enkawltu tur sorkar ṭha a ni a, Mizo hnam hian ṭhat hi kan tlin. Puih tlakte pui a, miretheite pui tur sorkar din kan tum. Sorkar ṭha kan neih chuan ram nuam kan siam thei dawn a, Mizoram hmun tinah sorkar ṭha an duh ngawih ngawih tawh," a ti.

Sorkar laipuia minister pakhat chu London-a a zin laiin a chenna in dap a nih tawh thu sawiin Sawta chuan, "Cheng nuai 300 chuang an hmu a, a pawisa a nih loh thu a sawi chûl mai a ni," a ti a; chutiang deuh chu Mizoramah pawh an awm thu a sawi.

Lalsawta chuan, Champhai DC leh Kolasib DC sawn chungchang sawiin, "Mipuiin ngaihdan kan nei tawh. Ka seh tawh chu ka seh tawh, ti tlat loin diknain rorel se a tâwk mai. Zu zawrh chungchangah seh tawh tih vanga seh tlat pawizia hre tawhtu kan ni," a ti.

MPCC President chuan, chhan hrang hrang vanga an party chhuahsan tawhte chu kîr leh tura sáwmin, "Khawngaihtakin lo kir leh rawh u, in tan hmun a awm e. Kan thil tum a ṭhat êm avang leh tum ngheh em avangin kan party-a la awm ngai lote pawh kan lo lâwm a che u," a ti a; Congress party chu inthliarna awm ve lohna, vangvat kai tih sawi rîk ve lohna a nih thu a sawi.

MPCC treasurer Zodintluanga Ralte pawhin thu sawiin, Mizoram dinhmun enin a beidawn thlak thu a sawi a, "Sorkar hnathawk hlawh lâk headline news a ni tawh a, a zahthlak. Congress sorkar laiin an hlawh bakah GP fund an mamawh hunah pek an ni. Tuna kan sorkar hi wheel barrow pawh a ni tawh lo, nawr kal hleih theih a ni tawh lo," a ti.

Zodintluanga chuan ramri chungchang sawiin, "Kan sorkar lai khan kan ram hi inchi khat pawh kan tawlh lo. Tuna sorkarah chuan Mizote'n kum tin an hmunphiah an lâk ṭhinna chu vawiinah an seng thei tawh lo a ni," a ti a; MNF sorkar hnuaiah Mizote'n nasa taka Mizoram an chân thu a sawi.