KHAWTHLIR

Champhai NGO-in Thu dawn an nei lo
Champhai District Joint NGO-te'n Champhai DC Maria CT Zuali transfer order sût tura Mizoram sorkar an phûtnaa hun tiam an siam chu nimin khan a tàwp a, nimin tlai dar 5:30 thleng khan sorkar aṭangin thu dawn an nei lo. Champhai district Joint NGO hian transfer order sût an phûtah hian Mizoram sorkar chu January 18, 2022 thleng an ngaihchàn tur thu an lo sawi tawh a, an hmalak zel dan tur ngaihtuahin vawiin chawhma dar 11 hian an ṭhukhawm leh dawn a ni.

Random test-ah Mi 38 hmu chhuak
Nimin khan Zion Street, Aizawlah rapid antigen test hmangin Covid-19 sample random test tih a ni a, mi 218-te swab sample endik niin, Covid-19 vei mi 38 hmuh chhuah a ni a, positivity rate chu 17.43% a ni. January 17, Thawhṭanni khan Millennium Centre kawta random test-ah mi 136 endik aṭangin hripui vei mi 19 (13.97%) hmuh a lo ni tawh bawk.

Kala Utsav-ah Mizo pakhatna
January 1-12, 2022 chhunga India ram state hrang hrangte intihsiakna, National Kala Utsav 2021 chu a hmáwr bâwk a ni a, Visual Arts 3D painting-ah Mizoram aiawha tel Lalruatfeli, Kids Care School, Ramhlun South-a pawl 9 zirlai chu pakhatna a ni. Lalruatfeli hian lawmmanah Rs 25,000, certificate, trophy leh medal a dawng.

MZP-in an dem
MZP chuan, January 17, Thawhṭanni zing dar 8 vel khan Muallungthu rama Tuizual zauah Jovel Molsom (23), Boktomohon, Gomati district, Tripura chu thia chhar a ni tih an tarlang a; thil thlen hun chu January 16, Pathianni nia a lan thu sawiin, "Pawikhawihtua rinhlelh chu Raju Singh (33), Tuipuibari khua, Tuikuk a ni. Tuikukte'n Mizorama buaina an siam ṭhin duh tâwk mai lo a, Zo hnahthlakte chunga hleihlen an chhuah fo leh nunna hlu tak an la fo mai hi hriatthiam har kan ti hle,"an ti. Pawi khawihtu chu a phu tâwka hrem an phut thu an tarlang.