Mizoram sorkar aṭanga sum dawn loh vangin Sainik School-in hma la turin Governor ngen

Sainik School, Chhingchhip hotute chuan nimin khan Governor Hari Babu Kambhampati chu Raj Bhavan-ah an kâwm a; Mizoram sorkar aṭanga ṭanpuina sum an dawn ṭhin chu hun eng emaw chen an dawn tawh loh avangin hma lâksak turin an ngen.

Sainik School principal Wg.Cdr Sharul Hameed chuan, sikul hmuhma chei leh siamṭhat hna chu state sorkar kut a nih thu leh Mizoram sorkar aṭanga sikul cheibâwl hna thawhna tur sum an dawn ṭhin thu a sawi a, “Tun hnai aṭang khan ṭanpuina sum hi kan dawng tawh lo. State danga Sainik School-te ruala ke pên ve thei tur leh hmunhma ṭha zawk nei tur chuan theihtawp chhuaha ṭân lak a hun tawh. State sorkar aṭangin Sainik School cheibâwlna tur pawisa a hma thei anga dawn kan mamawh tawh hle a ni,” a ti.

Governor Hari Babu Kambhampati chuan, Sainik School hotute chu a remchan dan anga theihtawp a chhuahpui tur thu a lo hrilh a; India ram hmun danga Sainik School-te aia ṭha zawk Mizoramin a neih theih nan ṭan la zel turin a chah.

Sainik School, Chhing­chhipah hian pawl 6-10 thleng zirna awmin, zirlai 300 an awm mek a, pawl 11 leh 12 zirna hawn thuai tum a ni a; tualchhung mi (Mizoram mi)-te tan seat 67% awmin, state páwn lam mite tan 33% a awm.

India rama Sainik School 33 zingah Chhingchhipa Sainik School hi hmeichhe naupangte luh ve theihna tura bul ṭanna hmun a ni.