Ni 18 chhungin rakzu litre 4,588 man

Excise & Narcotics department (END) chuan kumin 2022-ah January 18 thleng khan heroin gram 391, rakzu litre 4,588 leh sapzu úm 1,010 an man tawh.END enforcement-te chuan nimin khan Phunchawng leh a chhehvelah dan kalha zu siamna hmun eng emaw zat an luh­chhuah a; rakzu litre 1,500, zu bilh lai ṭín 1,000 leh dan bawhchhia mi pakhat an man a, zu siamna hmunte leh zu siamna bungbél eng emaw zat an tichhe bawk.

Nimin vêk khan END chuan Thenzawl-Lunglei World Bank Road-ah Aizawl aṭanga phurh rakzu litre 341 an man bawk a ni.

END chuan, tunlaiin dan kalha rakzu siam, bâwlhlo hlauhawm tak, awlsam taka mihring taksa tichhe thei an hmang ṭhin tih sawiin, “Hetiang zu in hi a hlauhawm em em a, lungphu chàwl, kal (kidney) leh thin (liver) ṭha lo leh natna dang a thlen awlsam êm avangin hetiang zu hi an hmu fuh a nih pawhin in lo turin mipui ngen an ni,” an ti.