NIT-Mizoram hmun buaina sawiho

Higher and Technical Education (HTE) minister Dr R Lalthangliana hoin nimin khan a pisaah sorkar hotute’n Lengpuia National Institute of Technology (NIT) ram buai chungchang an sawiho. NIT campus tur chu riverine forest reserve a nih avanga November 2021-a HTE-in forest clearance an dil tawh bawhzui chak turin a kaihhnawih department-te an duh thu an sawi.

Dr R Lalthangliana chuan, NIT Mizoram campus, Lengpui chu ṭhangtharte tana rotling tur a nih thu sawiin, “A nih tur ang taka rang taka puitlintir hi kan tihmâkmawh a ni a, sorkar department-te pawhin a hlawhtlin nan harsatna awm theite pawh Mizoram dah hmasa chunga tun aia nasa lehzuala hma kan lak a pawimawh,” a ti a; engti kawng zawng pawha tihhlawhtlin an tum tur thu a sawi.

HTE Minister chuan, Environment, Forest & Climate Change (EFCC) department, HTE department leh NIT hotute chu tun kar chhunga dawhkan khat kîla ṭhukhawm tur leh harsatna awm theite chingfel turin a hrilh a ni.

Principal chief conservator of forests Jitendra Kumar chuan, theihtawp chhuaha Mizoram ro hlu tur a hlawhtlin theih nan ṭan lak a tum thu a sawi a, “Tun kar chhungin a kaihhnawih department-te nen chinfel dan tur zawn a ṭha,” a ti.

Lengpuia NIT, Mizoram campus hi riverine forest reserve huam chhung a nih vangin forest clearance dil a ngai a, nimina Minister hoa ṭhukhawm chuan HTE department-in November 2021-a forest clearance dilna an thehluh tawh chu a kaihhnawih department lamin bawhzui chak se an duh thu an sawi.

Ṭhutkhawmah hian EFCC leh HTE department hotute leh NIT, Mizoram hotute an tel a ni.