SEDP hnuaiah vaimin leh bekang chíng turin chhungkaw 10,000 ruahman a ni

Agriculture Development Board chu an chairman C Lalrinsanga, Agriculture minister hoin nimin khan Secretariat conference hall-ah an ṭhukhawm a, SEDP hnuaia vaimim leh bekang chîn chungchang sawihoin, SEDP hnuaia vaimim leh bekang chíngtu chhungkaw zat tur chu 10,000 ni se, an ti.

C Lalrinsanga chuan, SEDP hmalakna thoin kum 2019-20-ah vaimin chìn a hlawhtlin thu sawiin, “Vaimim thar a pung a, vaimim hi la kalpui zel a ṭha. Vaimin leh bekangah SEDP hnuaia hmalak tum a ni a, vaimim chíngtute thoin an ram ngaiah vaimim an thar zawhah bekang an chìn lehin lei hànna eng emaw chen a siam thei,” a ti a; thlai pahnih chu relay cropping anga kalpui a nih tur thu leh hamṭhatna dawng tur thlan leh vil pawh an uluk dawn thu a sawi.

Ṭhutkhawmah hian Planning department-in ruahmanna an siamte sawiho a ni a; Board chuan SEDP hnuaia vaimim leh bekang chíngtu chhungkaw zat tur chu 10,000 ve ve ni se, lei hànna ṭha tur ngaituahin vaimim leh bekang chíngtu tur hi chhungkaw thuhmun ni se an ti.

Vaimim leh bekang chìnna hmun tur uluk taka thlan ni se, inkaihhruaina mumal taka siamin, sorkar flagship programme a nih angin uluk leh fimkhur taka kalpui ni se, an ti bawk. SEDP hnuaia vaimim leh bekang chìn nan Planning department chuan cheng vbc 71.50 a ruahman a ni.

Ṭhutkhawmah hian Agriculture Development Board vice chairman H Biakzaua, MLA, Agriculture secretary J Hmingthanmawia leh Board member-te an tel.