NGHAM-in Covid-19 chungchangah long term plan siam a ṭul an ti

Non-Government Hospital Association of Mizoram (NGHAM) hruaitute chuan nimin khan Health minister Dr R Lalthangliana chu a pisaah an kâwm a, Covid-19 chungchangah hun rei zawk daih tur ruahmanna (long term plan) siam a ṭul thu an hrilh.

Minister Dr R Lalthangliana chuan, Mizoramin Covid-19 léng donaa theihtawp a chhuahnaa NGHAM hmalakna chhuanawm a tih thu a sawi a, “Zoram Medical College chu dedicated covid hospital-ah kan puan avangin Covid-19 vei mekte bak kan enkawl thei lo a, hetih laia non-covid leh post-covid damlote private leh kohhran damdawi-inte’n in lo dawnsawn hian nasa takin kan phur a chhâwk zângkhai a ni,” a ti.

NGHAM hruaitute chuan, Covid-19 chu kum eng emaw chen a la chámbáng dawna a lan avangin sorkar ang pawhin long-term plan siam a ṭul thu an sawi a; infectious disease hospital din chungchangte an sawipui bawk.