January-ah hripui vei mi 12,093 hmu tawh

January 17, Thawhṭanni khan Mizoramah Covid-19 vei mi 1,280 hmuh chhuah a ni a, kumin January thla chhungin mi 12,093 hmuh a ni tawh. Nimin khan hripui vei dam tawh mi 1,169 chhuahtir an ni a, mi pakhat a thi.

Covid-19 vei hmuh thar mi 1,280-te chu mipa 559 leh hmeichhia 721 an ni a; ZMC laboratory-a hmuh chhuah 137, TrueNAT hmanga hmuh 66, RAT hmanga hmuh 1,042 leh FIA hmanga hmuh 35 a ni. An zinga mi 735-in symptom an nei a; positivity rate chu 17.03% a ni.

Sample endikna district pasarih zingah positivity percentage 10% aia a sànna district pariat a awm a, a sànna ber Aizawl district-ah 21.70% a ni a, Khawzawlah 20.99%, Saitualah 19.82%, Lungleiah 19.46%, Champhaiah 18.85%, Mamitah 17.86%, Hnahthialah 16.33% leh Serchhipah 10.44% a ni. Lawngtlai district-a sample pakua endik zingah hripui vei an awm lo.

IPR tarlan danin, Covid-19 positive hmuh tamna thingtlang khua leh Aizawla vengte chu - Bunghmunah 37, Thénhlûmah 34, Thenzawlah 29, Keifangah 28, Chawngtlaiah 21, Dárlâkah 20 leh Durtlang Leitanah 26 a ni.

Lengpui Airport-ah state páwn aṭanga rawn lut zingah Covid-19 positive mi 38 hmuh a ni a, Kanhmun, Vairengte leh Bairabi screening point-ahte eng emaw zat hmuh a ni bawk.

Nimin tlai dar 5 thleng khan hripui vei dam tawh mi 1,169 chhuahtir an ni a, kumina chhuahtir an tam ber ní a ni. District tina chhuak zat chu - Serchhipah 371, Aizawlah 276, Khawzawlah 148, Champhaiah 132, Hnahthialah 65, Mamitah 57, Lungleiah 47, Saitualah 39, Kolasib-ah 16, Lawngtlaiah 12 leh Siahaah paruk a ni.

IDSP record angin, Mizoramah Covid-19 vei 1,53,758 hmuh chhuah a ni tawh a, mipa 73,626 leh hmeichhia 80,132 an ni a, mipa aiin hmeichhia 6,506-in an tam zawk. Nimin tlai dar 5 thleng khan mi 1,45,485 (94.62%) chhuahtir an ni tawh a, mi 573 (0.37%) thi tawhin, enkawl mek mi 7,701 (5.01%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,53,758 chu mi 1,000 zelah hripui vei mi 140 an awm ang a ni a; mi 1,00,000 zela Covid-19 vangin mi 52 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 17, 2021 thlenga swab sample endik tawh 15,88,723 aṭanga RT-PCR hmanga endik zat percentage chu 21.06 a ni a, RAT hmanga endik zat chu 73.15% a tling.