PWD kawng siam Ailawng YMA-in an enkawlna turah thuthlung ziah a ni

PWD-in kawngpui an siam, Ailawng Branch YMA-in an enkawl zui tura ruahmanna, Commu­nity Base Road Main­tenance Contract Works atan PWD leh Ailawng YMA-te chuan nimin khan Khuangchera Hall, Ailawngah thawhhona thuthlung an ziak. Thuthlung ziahna hun hi bialtu MLA Lalrobiaka leh MJA hruaitute'n an hmanpui.

Inremna thuthlungah hian PWD aiawhin executive engineer David Sapzova'n hming a ziak a, Ailawng khawtlang aiawhin YMA president Zoramthanga'n hming a ziak a ni.

Thuthlung ang chuan, PWD kawng siam, Tlawng lei aṭanga Ailawng khaw hmawr, Reiek khua nena an inrina lai, Lunghmul lui inkar kawngpui, km. 12-a thui chu Ailawng Branch YMA-in kumkhat chhung an enkawl dawn a, a hun hi kumin September-ah a inṭan ang.

Kawng enkawlna atan hian Ailawng YMA chuan km. khatah Rs. 40,000 zel dawngin kawngpui an vil dawn a; kawngpui an enkawl huam chhungah hian kawngpui thawm ṭhat, kawng khuar hnawh, tuihâwk luankawr tihfai, kawngsir tawn tawna hnim (kawng ba) tihfai leh kawngpui dung humhalhte a tel.

Bialtu MLA Lalrobiaka, ZIDCO chairman chuan, kawngpui enkawl tura PWD leh YMA-in thuthlung an ziak chu kawng enkawl chungchangah hmasawnna thar a nih thu a sawi a, "Kawng enkawlnaah khawtual mite an tel thei tur hi thil lawmawm tak, a kawng zawhtute tan thleng pawha neitu riltu pe theitu tura hmalakna, ram changkang zawkah pawh hlawhtling taka an kalpui mek a ni," a ti.

Lalrobiaka chuan, PWD leh YMA hmalakna thar chu sawiseltu ni lo a, a hlawhtlin nan theihtawp chhuahtu nih tum turin Ailawng mipuite chahin, "Sorkar ta hi mipui ta a ni a, sorkar chu mipuite siam a ni. Sorkar thil leh bungrua hi mipuite ta a ni a, a nihna ang taka duat enkawl turin kan inngen a ni," a ti a; kawngpui chu hmasawnna bulṭhut a nih avangin a humhalh kawngah theihtawp chhuah turin mipui a chah.

PWD EE David Sapzova chuan, kawngpui enkawl kawnga YMA nena thuthlung ziah tâk chu, kawng­puite mipuite'n ta neih se tih duhna leh sorkar ṭhahnemngaihna aṭang rawn irh chhuak a nih thu a sawi.

MJA president Zonunsanga Khiangte pawhin thu sawiin, kawngpui enkawl chungchangah Ailawng khawtlang mipuite fuihna thu a sawi a ni.