Manipur bill dodâlnaa thite sûnna hun hmang

Manipur state Assem­bly-in tribal-te nêkchêpna tur dan a pass dodâl vanga thite hriatrengna hun nimin chhun khan Lamka, Manipur-ah hman a ni a; nunna chánte hriatrengna an siam chu Zo Reunification Organi­sation (ZORO) president R Sangkawia'n a hawng.

R Sangkawia chuan, sorkar hrang hrang hnuaia awm mek Zo fate chu eng tikah emaw chuan Pathianin a la hruai khawm ngei an rin thu sawi­in, "Chu hun chu nghakhlel takin kan thlir mek a ni. Nang leh kei hian kan ring ngam lo a nih pawhin, Pathian hian a tum chu a tihlawhtling ngei ngei dawn a, Zoram tharah hian min thên kai ngei dawn a ni," a ti.

August 31, 2015 khan Manipur Assembly chuan bill pathum a pass a, chungte chu Manipur-a tlang mite nêkchêpna turah ngaiin, Anti-Tribal Bill tia sawi zui a ni. Assem­bly-in bill a pass-te chu nasa takin dodal a ni a; mi eng emaw zatin an thih phah bakah, MLA ṭhenkhat inte pawh hâl a ni.

Manipur-a Zo hnah­thlakte chuan Joint Action Committee Against Anti-Tribal Bills an din a, Committee chuan Lamka khaw sira Mata Dam (tuikhuah) bulah Tribal Martyrs Memorial Park an siam a ni. Park-ahchuan Tribal Martyrs Memorial siam a ni a, chu chu nimin khan ZORO President-in a hawng a ni.