Ram leh hnam humhalh chungchangah CYMA-in inràwn khawmna a buatsaih

Central YMA chuan YMA kumpuan 'Ram leh hnam humhalh' chungchangah August 30, Ningani zan khan Vanapa Hall-ah Aizawla YMA branch hruaitute pualin inràwn khawmna an buatsaih. CYMA presi­dent Vanlalruata chuan, khawpui chhunga YMA branch-te'n ILP dap beihpui an lo thlâk tawh ṭhin aia nasa leh rualkai zawka beihpui an thlak leh a ṭul thu a sawi.

CYMA President chuan, YMA branch tinin Inner Line Permit (ILP) chhinchhiahna an neih a pawimawh hmasa tih sawiin, Aizawl khawpuia branch-te chu an ṭanrual chuan nasa takin awmzia a nei dawn tih a sawi a; ILP lem siam ngam an awm thu sawiin, "YMA chuan ILP nei lo leh dik lo dap a man khawm a, police kuta hlan mai lo a, a hnu leha kalpui dan tur pawh YMA-in kan ngaituah a ngai a ni," a ti.

Mizoramah hnam dang sumdawng an luh theihna dan mumal a la awm loh thu sawiin Vanlalruata chuan, sum­dawnna lian leh chang­kang zawk, a neitu pawh Mizo din tak ni ngeite chu an dodal loh thu a sawi a, "Hnam dang Mizorama rawn sumdawngte erawh chu kan dodal ngam tur a ni", a ti a; Mizo aia hnam dang in luahtir kawngah YMA chu thuneitu ni lo mah se, in luah tur neite'n hnam dang an luahtir loh nan YMA-in hma an lak a hun thu a sawi.

Tripura aṭanga Mizo­ram Bru lak let tumaa Bru ho thil tih kual dan chu sorkar official-te'n an kham tawh hle nia sawiin Vanlalruata chuan, Bru-te chu Mizoramah let duh ni se, an awmna tur Mizoram mite an hêk an hêk a rin loh thu a sawi a, "A ṭul angin YMA-in hma a la dawn a, kan hmalak zelnaah eng harsatna pawh thleng se, Tuikuk vangin engmah kan tuar tur a ni lo," a ti.

Inràwn khawmna hi CYMA vice president R Lalngheta'n a kaihruai a; zawhna leh chhana hun an hman bakah, YMA anga hmalak zel dan tur sawihona a ni.