Plastic bag ûm bo beihpui thlak ṭan

UDPA-in Central scheme a kalpui mek, DAY-NULM hnuaia Durtlang Area Level Federa­tion (self help group nu ho inzawmkhawm) chuan nimin khan MC Hall-ah 'Aizawl khawpuia plastic bag ûm bo beihpui thlak hawnna' an buatsaih a, UDPA minister Zodintluanga'n hawngin, dawr hrang hrangah lehkha hmanga ip siam (paper bag) a sem nghal.

Zodintluanga chuan, "Paper bag umbo tura bul ṭan a ni chu ram leh hnam leh, nakin huna tu leh fate thlenga an dam khawchhuahna vawn himna tur bul kan ṭan a ni a, a ropui hle a ni," a ti a; plastic bag um bona tura Durtlanga self help group (SHG) 19 inzawmkhawm, member 155 nei Area Level Federation (ALF) hmalakna chu ropui a tih thu a sawi.

SHG dangte pawhin inhlawm khawma hma thar an lak a beisei thu sawiin Zodintluanga chuan, "Meisí chauh ni mah ula, kan rama movement tilian turin in pawimawh. Vawiin aṭang hian hmun dang tam takah SHG an inhlawm khawm ve a, hma an lak thar ka beisei," a ti a; paper bag siam kawnga hma latu Vanlalramchhuangi hmalakna chu ṭha a tih thu a sawi.

Zodintluanga chuan, UDPA chu khawpui tihhmasawnna tura hma latu tur chauh a ni lo a, retheihna umbo (poverty alleviation) kawnga hma latu pawh a nih thu a sawi a, Poverty alleviation lamah nasa takin hma kan la a, mahni thiamna lama eizawnna nei turin mi sing tam tak training pek an ni. Khawpuia in nei lo chhungkaw 1,062 tan chenna siam a ni a, ram nei in sa thei lo leh chei ṭha thei lo chhungkaw 70,000 chuang ṭanpui an ni a, hengte zawng zawnga piaha kan ngaih pawimawh ber chu self help group a ni," a ti.

UDPA Minister chuan, Mizo­rama SHG ṭhenkhatte'n SHG nihna tak anga kalpui lo a, sorkar aṭanga ṭanpuina chauh an ngaihtuah ṭhin chu pawi a tih thu a sawi a; Durtlang SHG inhlawm khawmte chuan tih tak zeta an thawh avangin hlawhtlinna an hmuh ngei a beisei thu a sawi bawk.

UDPA secretary Dr C Vanlalram­sanga pawhin thu sawiin, Dur­tlanga SHG-te thil tih chu ram chhanna, tu leh fate thlenga chhenfakawm tur a nih thu a sawi a, "Environment ṭhatna atante leh nakin thlenga chhinchhiah tlak tur thil a ni. Nu hoin tih tak zeta thil in tih hi chuan thil a kal duak mai ṭhin a ni," a ti.

Durtlang Area Level Federation hnuaiah hian SHG 19 inzawm khawmin, member 155 an awm a, August 29, 2017 khan Open Doors kaihhruaina hnuaiah an indin a ni. An member-te chuan anmahni intuma hma lain, sahbawn phutte an siam a, changpât hmanga leiṭha siamna an din bawk.

Durtlang SHG-te'n Aizawl khawpuia plastic bag ûm bo beihpui thlakna an kalpui tur hi hawn a nih hnuah nimin aṭang khan paper bag-te chu dawr hrang hrangah an sem chhuak ṭan a; minister Zodintluanga'n a semnaah hian bul a ṭan a ni.