KHAWTHLIR

HIV awareness
Mizoram State AIDS Control Society (MSACS) leh Samaritan Society of Mizoram, FHI 360, SHALOM leh Sairang PHC-te chuan nimin khan Sairang YMA Hall-ah free health clinic leh HIV awareness campaign an buatsaih. He hunah hian doctor parukin mi 300 chuangte dinhmun an enfiah a; HIV test leh blood group test an tihsak bakah, damdawi an mamawh angte a thlawnin an pe a ni.

YMA In hawng
Dampa bialtu MLA Lalrobiaka chuan nimin khan a MLA fund hmanga sak, Ailawng YMA In sak thar a hawng. YMA In sak nan hian Rs. 2,00,000 sên a ni.

Hnam dang nei lo tura inzirtirna
MZP chuan nimin khan Vanapa Hall-ah hnam dang nupui/pasal nei lo tura inzirtirna leh career awareness campaign an buatsaih. Chawhma lamah hnam dang nupui/pasal nei lo tura inzirtirna hun hman niin, MZP President-in thu a sawi a; chawhnuah career awareness neih niin, Clement Liankunga, IAS (Rtd.), Lt.Col. Clement Lalhmingthanga, SBI chief manager LP Changkima leh nursing tutor Laldinpuii Sailo ten thu an sawi a ni.

Inthlan tur sawiho
Mizoram Peoples Forum (MPF) Thenzawl Joint Local Forum hruaitute leh Thenzawla political party hrang hrang hruaitute chu August 30, Ningani zan khan Thenzawl Field Veng Presbyterian Kohhran Sunday School Hall-ah an inhmu khawm a; kumina Mizoram Assembly inthlanpui awm turah inthlanna dik, felfai, thianghlim leh zalen a awm theih nana hmalakho dan tur an sawiho. MPF leh political party-te thawhhona thuthlung an sawiho bawk.

Vaihlo leh ruihhlo That lohzia inzirtir
National Tobacco Control Programme (NTCP), Lawngtlai district chuan NEDP hmalakna hnuaiah nimin khan Lawngtlaia Region Higher Secondary School-ah vaihlo leh ruihhlo ṭhat lohzia zirtirna hun an buatsaih a; Swachh Bharat Mission (Urban) hnuaiah fai inzirtirna hun hman nghal a ni bawk.