Mizorama hmasawnna lian reng reng Congress sorkar laia thleng a ni - Hawla

Chief minister Lal Thanhawla chuan, Mizorama hmasawnna lian tham, permanent asset reng reng chu Congress party sorkar laia thleng a ni zel niin a sawi a; chutih rualin, medical college MIMER din chungchangah MNF hoin an kuhmûmah Congress sorkar an pár nia an sawi chu tlàwmah a lak loh thu a sawi.

Lal Thanhawla hian nimin khan Congress Bhavan-a inkhawmah thu sawiin, Mizorama hmasawnna lian tham - Bairaibi-a rel luhtir te, Sairang thlenga rel kawng siam mek leh Kawrpuichhuah thlenga rel kawng siam tum te, airport-te leh thil dangte chu Congress sorkar laia thleng a nih thu a sawi a, "Mizorama permanent asset reng reng hi Congress sorkar lai zelin a piang a ni," a ti.

MIMER din chungchangah Lal Thanhawla chuan, "MNF hoin kan kuhmûmah an par, te min ti a; hetianga an sawi ho tlàwmah ka la lo. Mahse, an kuhmûm hi a par har hle mai a, engati nge an kuhmûm hi an sorkar kum 10 chhung khan a pàr hman loh, tih hi ka zawhna a ni," a ti a; MNF sorkarin Referral Hospital atana building an sakah ar leh kelte vulh a nih thu a sawi.

MPCC President chuan, NLUP an sem zel dawn tih sawiin, "Miin hêk ṭhin mah se, mamawhtu an awm chhung chu NLUP hi kan sem zel dawn. Party dangin NLUP hi mi pakhat hmingin High Court-ah an khing a, NLUP hi Lal Isua lamṭang programme a nih avangin an hlawhtling chuang lo ang," a ti.

Lal Thanhawla chuan, a kaihhruai sorkar chuan Mizoram hmasawnna turin ruahmanna leh hmachhawp tam tak an neih thu a sawi a, "Tuirial Hydel Project leh Referral Hospital-te hre reng rawh. Tuna kan hmachhawpte hi a hlawhtlin theih nan kan sorkar chhunzawm zel a ngai a ni," a ti a; Siaha district-a Latawh ramah thlawhna ṭumhmun siam turin DPR buaipui mek a nih thu a sawi bawk.

Nimina Congress Bhavan-a inkhawmah hian MPCC President chuan an party zawm thar mi eng emaw zat a lawm lut a; chu'ng zingah chuan ZNP economic adviser Joseph L Ralte (kum 2013 inthlana Tuirial biala ZNP candidate) leh ZNP PAC member PB Lalsawmliana (kum 2013 inthlana Serchhip biala ZNP candidate)-te an tel a ni.