ZPM innghahna - Pathian thil tih theihna - Rev. Robawiha

Zoram Peoples' Movement (ZPM) chuan nimin khan an pisaah mi thar lawm luhna inkhawm an buatsaih a, ZPM Val Upa Council member Rev. Robawiha'n thu sawiin, ZPM chuan Pathian thil tih theihna lo chu innghahna dang an neih loh thu a sawi.

Rev. Robawiha chuan, "ZPM hian kan Lalpa thil tih theihna chauh lo chu innghahna dang, MNF leh Congress-te angin kan nei ve lo. He ram hi Lalpa’n din thar a, ram ropui taka min siam a duh avangin atana ding ngam tur a zawng khawm mek a ni," a ti a; Pathian lawm zawng hlen chhuak turin, zâm lo leh Pathian rinchhana theihtawp chhuah turin Zoram mipuite a chah.

Rev. Robawiha chuan, Pathian thuin awm dan ṭha, kawng dik leh inkaihhruaina ṭha a kawhhmuh tih sawiin, vanram pawh ringtute chan ngei tur a nih thu a sawi a, "Vawiina kan ram dinhmun en chuan lungawina tur leh hlimna tur a awm lo niin a lang. Kan ram kan rethei a, Congress leh MNF-in kum 30 chuang min kaihruai tawh a, mipui kan dam lo a, ram a him lo a, miretheite kan bet tlawk tlawk a, kan hnam a dam lo a ni," a ti.

ZPM inkhawm hi an chairman Lalliansawta’n a kaihruai a, ZPM senior vice chairman F Rohmingliana’n ZPM zawm tharte a lawm lut tih an tarlang.