NLUP Kûtpuiah Rs.80,90,384 sên a ni

3rd September, 2018

Mizoram sorkarin kumin March thlaa Aizawla NLUP Kûtpui a buatsaihnaah Rs. 80,90,384 sèn a ni a; sum sênna chi hrang 21 tarlan zingah NLUP lukhum leh pamphet siamna cheng nuai 19 leh dawr siamna, a hmunhma cheina leh thuziak târna atana nuai 14 chuang sennate chu a tam zual a ni.

Vanglaini chuan March 6-9, 2018 chhunga Aizawla NLUP Kûtpui buatsaih chungchang NLUP Implementing Board (NIB)-ah RTI Act hmangin a zawt a; NLUP Kûtpui neih chhan chu, NLUP hnuaia kut hnathawktute thil thar chhuah puanzar leh tihlârna tura buatsaih a nih thu an tarlang.

RTI Act hmanga zawhna chhanna chuan, "Kut hnathawktute chawikanna atana buatsaih a ni a, NLUP hnuaia farmer te, thil siam chhuaktute leh trade hrang hrang hnuaia beneficiary-te'n an thil thar chhuah/siam chhuahte man man leh hlawk zawka an hralh theih nan te, kut hnathawktute thiam thil/deh chhuahte mipui hnena puanzar leh tihlârsakna atana hman ṭangkai a nih theih nante buatsaih a ni," a ti.

Thil siam chhuaktute leh a leitute'n hlâwk zawka an lei leh hralh (marketing)-na tur leh man man zawka indawr tawn a nih beisei vang te, NLUP hnuaia thar chhuahte chu man man zawka hralh a nih theih nana marketing atan hmalakna pawimawh tak pakhat a nih thute tarlan a ni bawk.

RTI Act hmanga zawhna chhannaa a lan danin, kumin March thlaa NLUP Kûtpuiah hian NLUP lukhum leh pamphlet atan Rs. 19,07,700 hman a ni. Lukhum chu Mizoram pawnah chi thum an siamtir a, district dangah NLUP Kûtpui hmanna atan sem chhuah a ni a; pamphlet pawh district dangah sem chhuah a ni.

'Construction of stall, decoration, hoarding' tihah Rs. 14,95,000 sen a ni a; cheng nuai 10 chuang senna dangte chu - Miscellanous expenditure (flag, invitation, hall hiring charge, refreshment, mineral water, award, etc) atan Rs. 11,08,236 leh Subsidy and micellaneous expenditure incurred by Commerce & Industries deptt atan Rs. 11,17,657 sen a ni bawk.

Aizawla NLUP Kûtpuia sum senso
# Sum hmanna Hman zat
1. Subsidy & miscellaneous expenditure incurred by Agri deptt. Rs. 4,41,972
2. Subsidy & misc. expenditure incurred by Env., Forest & Climate Change Rs. 90,140
3. Subsidy & misc. expenditure incurred by UDPA deptt. Rs. 2,27,982
4. Subsidy & misc. expenditure incurred by Horticulture deptt. Rs. 3,18,758
5. Subsidy & misc. expenditure incurred by Land Resources, Soil&Water Conservation Rs. 1,18,163
6. Subsidy & misc. expenditure incurred by Sericulture deptt. Rs. 1,10,214
7. Subsidy & misc. expenditure incurred by Fisheries deptt. Rs. 1,74,430
8. Subsidy & misc. expenditure incurred by Transport deptt. Rs. 3,200
9. Subsidy & misc. expenditure incurred by AH&Vety deptt. Rs. 2,72,470
10. Subsidy & misc. expenditure incurred by Commerce & Industries deptt. Rs. 11,17,657
11. NLUP caps & pamphlets Rs. 19,07,700
12. DDK live telecast Rs. 2,00,000
13. Subsidy incurred by MULCO Rs. 44,220
14. Expenditure incurred by NLUP Media Cell Rs. 1,99,700
15. Newspaper advertisement bill Rs. 63,000
16. Construction of stall, decoration, hoarding, etc. Rs. 14,95,000
17. Sound & hiring personel Rs. 16,000
18. DA for security personnel Rs. 7,400
19. Miscellanous expenditure Rs. 11,08,236
20. Subsidy incurred by Hnam Chhantu Rs. 1,45,862
21. Expenditure incurred by Lalzuia Research Foundation Rs. 28,300
TOTAL Rs. 80,90,384