Shelter home-te endik

State Level Shelter Monitoring Committee (SLSMC) chuan Deen­dayal Antyodaya Yojana - National Urban Livelihoods Mission (DAY-NULM) hnuaia péng pakhat, Scheme of Shelter for Urban Homeless (SUH) kalpui a nih dan August 31, 2018 khan an endik. Endikna hi Supreme Court-in March 22, 2018-a order a chhuah anga tih a ni.

Sorkar thuchhuah tarlan danin, endiknaah hian State Level Shelter Monitoring Committee chairman chu principal adviser to CM RL Rin­awma, member dang pahnih - UDPA secretary Dr C Vanlalramsanga leh MHIP general secretary T Lalthangpuii te an tel a; Zemabawka Shelter Home, TNT Pangpar Huan leh Durtlanga Special Blind School-te an endik a ni.

An endik hmunte hi tui in tur thianghlim, inthiarna, kâng ṭhelhna tur hmanrua, medical check-up, chaw ei tur ṭha, thawktute tana awm­na tur ṭha, register vawn ṭhat leh thil pawimawh dang hrang hrang hmangin an endik a ni. Zemabawk Shelter-ah khum 10 awmin, Mizoram Cancer Care Foundation-te'n an enkawl a, damlo doctor nghakte tana hahchawlhna hmun a ni. TNT Pangpar Huanah hian mi 421 enkawl mek an ni bawk.

Zemabawk Shelter hian DAY-NULM hnuai­ah building thar sak nan cheng nuai 20, a panna kawng siam nan nuai 4.14 leh operation & main­tenance atan Rs. 1,80,000, a vaiin nuai 25.94 an dawng tawh. TNT Pangpar Huan chuan operation & main­tenance atan Rs. 3,00,000 an dawng tawh a; Special Blind School-in retaining wall siam nan Rs. 3,00,000 leh operation & maintenance atan Rs. 2,40,000, a vaiin Rs. 5,40,000 an dawng tawh a ni.

Tun dinhmunah Mi­zoram pumah Scheme of Shelter for Urban Homeless (SUH) hnuaia khaw 15-ah shelter home a awm a; chu'ngte chu Aizawl, Saitual, Cham­phai, Khawzawl, Kolasib, Kawnpui, Vairengte, Thenzawl, Lunglei, Hnah­thial, Tlabung, Mamit, Lawngtlai leh Siaha-ahte a ni.

Shelter Monitoring Committee hian a ṭul angin Scheme of Shelter for Urban Homeless (SUH) hnuaiah Mizorama shelter home-te an endik ṭhin dawn a; thla thum danah Supreme Court-ah report thehlut ṭhin tura tih an ni.