ZPM-in Aizawlah street campaign an nei

Ṭangrual pawl, Zoram Peoples' Movement (ZPM) ṭhalaite chuan September 1, Inrinni khan Aizawla hmun hrang hrangah Street Campaign an huaihawt a, ZPM hruaitute'n thu sawiin, an pawl kalphung leh sorkar an din huna an hmalakna turte an puang.

ZPM hruaitute chuan, an pawl chuan kalphung thar an tiam angin, system thlakthleng an tiam tih sawiin, mi ṭha thup bona system aṭangin ram leh hnamin a chhawr ṭangkai theih tur mi ṭha leh dik pho chhuak leh hmang ṭangkai zawnga system thlak an tum thu an sawi a, "Ram zalen ni sia mahni dikna leh chanvo pawh hman hleih theih loh khawpa a thei thei leh a huamhauh apiang hausakna rama kan roreltute'n an chhuah hi siam ṭhat kan tum a ni," an ti.

Kut hnathawktute thar chhuah thlai thar lei leh hralh nana budget-ah dah an tum thu sawiin ZPM hruaitute chuan, "Awlsam taka kan thar chhuah mai theih sawhthing kg. 1-ah Rs. 50-a lei leh hmunphiah kg. 1-ah Rs. 100-a lei hi kan economy siamṭhat nana bul ṭanna ṭha berah kan ngai a, lei ngei kan tum bawk," an ti a; thlai dangte pawh a leina tur budget-ah an dah dawn avangin an lei zel dawn tih an sawi.

ZPM thuchhuah chuan, "Kan ram leh hnam him lohna chi hrang hrang, ei leh bara him lohna, ramri humhalh ngam lohna, hnam dang mite laka him lohna zawng zawng aṭanga mipui mangangte chhanchhuah an nih theih nan ZPM-ah lo tel vek turin Zoram mipui kan sáwm tak meuh a ni," an ti.