V/C thuneihna tam zawk pe turin Ruahmanna siam a ni - Thanliana,LAD minister

LAD minister PC Lalthanliana chuan, village council (VC)-te hnena thuneihna tam zawk leh mawhphurhna sang zawk pe turin sorkar­in ruahmanna a siam mek niin a sawi.

Cheng nuai 199.40 senga sak SIRDPR, Ex­tension Training Centre (ETC), Lungleia hostel building August 31-a a hawnnaah PC Lalthanliana chuan, "V/C-te hi Zoram hmasawnna bulṭhuta awm, rorel khawl pawimawh tak an nih avangin ram hmasawnna hna chak taka kalpui tur chuan mumal taka training pek a ṭul. Hmasawnna hna thawhna tur sum tam tham tak V/C-te kaltlanga thawh ṭhin a nih avangin rinawm tak leh dik taka an thawh a pawimawh a ni," a ti.

Ram chhung state hrang hranga Panchayati Raj system inrêlbawl dan mithiamte'n an zir tawh thu sawiin LAD Minister chuan, "V/C-te hi thuneihna tam zawk leh mawhphurhna sang zawk pe turin sorkarin ruahmanna a siam mek a ni," a ti a; state hrang hranga Panchayati Raj kalphung an zir chianna aṭangin Mizoram mila kalphung tur leh V/C thuam ṭhat dan tur ruahmanna siam mek a nih thu a sawi.