Governor-in bank thar IPPB a hawng

Postal department-in bank thar a din, India Post Payments Bank (IPPB) chu September 1, Inrinni khan India ram pumah a rualin hawn a ni a, Mizoramah pawh district hrang hrangah hawn a ni. Aizawlah chuan Governor Kummanam Rajasekharan-a'n Lal Thanhawla Auditorium-ah a hawng.

Governor chuan, Department of Posts-in sorkar laipui puihnaa ama puala payment bank a hawng ta chu hmasawnna ropui tak a nih thu sawiin, "Mipui náwlpui chhawr phaka bank service hnuh hnaih kawnga prime minister Narendra Modi thawhrimna rah a ni. IPPB thil tumte hi mi tam takin an ṭangkaipui dawn a, ram hmasawnna atana rahbi pawimawh tak a ni," a ti a; IPPB auhla 'I bank, in kawtah ngei' tih chu a taka a thlen ngei a beisei thu a sawi.

Tunlai khawvel thiamna leh internet ṭangkaina ṭhang zelah inbiakpawhna a awlsam tawh a, khawvel pawh a zím sâwt hle tih sawiin Larsap chuan, "He 'digitised world' ah hian tumahin hnufual bik nih an duh lo a ni," a ti.

Aizawla Postmater General T Mang Min Thang chuan, banking leh payment lama thiamna sang zel karah IPPB hawng tura thutlukna siam a nih thu sawiin, "He payment bank kaltlang hian India khua leh tuite'n bank rintlak, technology thar leh changkang ber bera thuam, dawr awlsam, inzár pharh ṭha leh mi inpe zote enkawl an chhawr ṭangkai thei dawn a ni," a ti a; IPPB chuan bank remchanna la chhawr ve lote rilruah savings pawimawhna a tuh dawn tih a sawi.

Inrinni khan IPPB hi India ram pumah branch 650 leh access point 3,250 hawn a ni a, prime minister Narendra Modi chuan Talkatora Stadium, New Delhi-ah a hawng. Mizoramah chuan hmun hrang hrangah branch paruk leh access point 24 hawn a ni a, kumin kum tawpah branch 39 leh access point 344 hawn hman tum a ni.