MZP-in Sept. 12-ah kawngzawh an tum

Mizoram chin leh ramri venhim kawngah leh Mizoram leh hnam himna lama sorkar hmalak an duhkhawp lohzia lantir nan Mizo Zirlai Pawl (MZP) chuan September 12, 2018-ah Aizawl leh MZP dinna khua zawng zawngah kawngzawh huaihawt an tum.

MZP hruaitute chuan Inrinni khan Aizawl Press Club-ah thuthar theh­darhtute an kâwm a; MZP president L Ramdinliana Renthlei chuan, Bairabi Zophaia Zofate Chawlhbûk sak an tum chu NGO-a kan thawhpui hrang hrang te, Mizoram Kohhran Hruaitu Committee (MKHC) leh Mizoram sorkarin an ngennate a zahawm an tih avangin chawlhbuk sak hnatlang chu an châwl lailâwk rih tih a sawi a, "Congress Legislature Party-in a rel tawh angin, Zophaiah hian Zofate Chawlhbuk sak thuai a nih theih nana hma la thuai turin Mizoram sorkar kan phut a ni," a ti.

L Ramdinliana chuan, chief minister Lal Thanhawla kaihhruaina hnuaiah Mizoram-Assam ramri chungchang ngaihtuaha a ṭulte bawhzuitu tur Core Committtee din a ni tih sawiin, "Chairman chu Home additional secretary Lalbiak­zama a ni a, he Committee-ah hian MZP pawh telh kan ni," a ti a; mah se, Core Committee chuan an beisei anga hma a lak tak loh avangin MZP chu August 3, 2018-ah an inhnûkdâwk ta tih a sawi.

MZP President sawi danin, Core Committee hi July 2018 ral hmain report kimchang Chief Minister hnenah thehluh tura tih a ni a; mahse, hma an la chak lo hle a, report thehluhna atana hun tiam, July 2018 a ral hnuah pawh hmalakna a chak loh em avangin MZP chu an inhnûkdâwk a ni.

Core Committee chung­­changa zawhna chhangin L Ramdinliana chuan, sorkar (ministry) lam ai mahin, sorkar official-te'n hma an la ṭha duh lo nia an hriat thu a sawi. Assam leh Mizoram ramri chungchanga Mizoram sorkar hmalakna an duhkhawp loh thu sawiin MZP President chuan, "Mizo ṭhalaite hmalakna chak zawka kalpui turin Mizoram sorkar kan ngen nawn leh a ni. September 10, 2018 ral hmaa Assam leh Mizoram ramri chung­changa hmalakna lian tham a awm loh chuan September 12, 2018 hian Mizoram pum­ah kawngzawh a ni dawn. Hemi hnua hmalakna a awm lo zel a nih chuan a ṭul angin MZP-in hma kan lak chhunzawm dawn a ni," a ti.

Zawhna chhangin L Ramdinliana chuan, Assam NRC list-a tel lo Mizorama luh tumte dang tura Vairengte, Bairabi leh Saiphaia an duty-naah August 29 thleng khan Assam NRC-a chuang lo Mizorama luh tum mi 424 an man tawh tih a sawi a, "Bairabi ILP counter-ah sorkarin duty a dah tâk avangin August 29 zan khan Bairabi hi kan chhuahsan rih," a ti a; August 29 hnu lamah pawh Mizorama luh tum mi 100 chuang chu an lettir leh tawh niin a sawi.

MZP President chuan, ramri hnaih khuaa an duty chhan chu sorkar hmalaknate Mizoram leh hnam tan a him tâwk loa an hriat vang a nih thu a sawi a, "Kan awm loh chuan sorkar lam mite hi an inthlahdah zel a, kan la duty zel a ni. Ka duty-na hmun, Bairabi lamah chuan police-te hi kan awm loh apiangin an awm lo ve nghal zel a, kan awm rei leh an awm rei ve a ni mai," a ti.

MZP President sawi danin, thla liam ta, August thla chhung khan Vairengte police checkgate aṭangin hnam dang 7,765 hnenah temporary ILP pek chhuah a ni. Temporary ILP hi pakhat Rs. 130-a khul a ngai a; August thla khan sorkar­in Vairengte aṭanga temporary ILP a pek chhuah aṭangin Rs. 10,09,450 (7765 X 130 = 10,09,450) a la lut tihna a ni.