KHAWTHLIR

Thisen pe
Inrinni khan Hmunhmelṭha Branch KṬP-in in an diamond jubilee lawm nan Champhai District Hospital-ah thisen unit 56 an pe, a petute mipa 44 leh hmeichhia 12 an ni. Leitan Bial KṬP-te'n Leitan Kohran Hall-ah Synod Hospital tan thisen unit 39 pein, a petute mipa 30 leh hmeichhia pakua an ni a; Republic Veng Branch KṬP member mipa 33 leh hmeichhia pangate'n Aizawl Civil Hospital tan unit 38 an pe bawk. Lairam Isua Krista Baptist Kohhran Ṭhalai Pawl, Lawngtlai College Veng Bial pawhin Lawngtlai District Blood Bank tan unit 53 an pe a, a petute mipa 41 leh hmeichhia 12 an ni.

Kawngzawh tum
Mizoram Govt. Lumpsum Grant-in-Aid Higher Secondary School Association leh lumpsum HSS dinna khaw pakuaa hruaitute chuan, adhoc grant-in-aid dinhmuna hlangkai tura sorkar kar nan September 15, 2018 khian Aizawlah leh an khua ṭheuhah kawngzawh an tum.

Oxygen bûr sem
Chalfilh bialtu MLA Dr Ngurdingliana chuan August 31 leh September 1, 2018 khan a bial chhung khaw 24 tan oxygen bûr 62 a sem. Oxygen bûr semna inkhawm hi Sesawng leh Dilkhan khuaah neih a ni a, oxygen bûr 62 hi Rs. 6,19,000 man a ni.

Faina hnatlang
Siaha Town Joint V/C bultumin Mizorama damdawi-inte faina kawnga an inelna, Kayakalp leh Mizoram khawpui fai intihsiakna pualin Siaha khawpuiah September 1 khan faina hnatlang neih a ni. Inrinni vek khan Lengpui Sanitation Committee chuan an khuaah faina hnatlang an buatsaih.

AgriPulse 2018
Indigram Labs, New Delhi leh MZU Incubation Centre chuan August 31, 2018 khan MZU Education department seminar hall-ah Agriculture lama hmasawnna lam hawi programme, ‘AgriPulse 2018’ an buatsaih.

TNT tawngtai dawn
Thutak Nunpuitu Team (TNT) chuan September thla chhung hian Mizoram tana ṭawngṭaina hun an hmang dawn a; Mizorama khua zawng zawng leh Aizaw-la veng tina kohhranho, khawtlang, misual leh mi hnuaihnung, mi chhumchhiate tan an ṭawngṭai dawn tih an tarlang. Ṭawngṭaipui duh bik neite tan 9862513936 leh 9402112183-ah thlen theih a ni.