PWD Minister-in kawng siam a enfiah

Chanmari kawn aṭanga Israel Point via Electric Veng kawng siam mek chu Inrinni khan PWD minister Lal Thanzara'n a tlawh a, hna thawh dan a enfiah.

Sorkar thuchhuah tarlan danin, kawng siam mekah hian V Lalliana building leh MUP Waiting Shed, Dawrpui inkar chu Interlocking Concrete Paver Block (ICPB) hmanga siam a ni a; metre 160-a sei leh metre 6-a zau a ni. ICPB chu a kîkawi chi (zigzag) niin, a chhah zawng chu milimetre 88 a ni a, meter square khatah block 39 zel hman a ni.

ICPB atan hian tui chhe paihna ṭha a pawimawh avangin tuihâwk luan kawr siamṭhat a ni a, kawng hi gradient a san avangin anchor beam pawh standard-ah chuan metre 20 dana siam ṭhin chu metre 5 danah siam niin, luikawr sir ve ve pawh RCC-a siam a ni. Kawng siam tura ruahman hi km. 1 vela thui a ni a, ICPB road bak hi bituminous hmanga siam tur a ni. A vaia sum sen tur chu cheng nuai 22 a ni a, NEDP aṭanga hmuh a ni.