Serchhip ZPM-in Operation Joshua an ṭan

Mipuite ZPM-a tel tur leh thlâwp tura Serpchhip constituency chhunga in tina luta sawmna tur, Operation Joshua tia an vuah chu ZPM Serchhip Steering Committee-in September 1, Inrinni khan an ṭan a; September 2018 chhung zawng kalpui an tum.

Serchhip ZPM Steering Committee hruaitute chuan, in tina luta sawmna an neih tur chu Joshua hoa Israel fate'n ramtiam lut tura an beih dante mitthla chung­in a hmingah Operation Joshua an tih thu an sawi a; "Sorkar dik lo paihthla a, kalphung thar - mipui sorkar din turin tih theih kan nei. Party politics ât­chilhna bâwih ata lo chhuak la, Pathian leh a kohhran hote duh dan ngaichâng chunga rorel intiam ngam ZPM - ṭangrual pawl hi rawn zawm ve teh. Thinlung takin kan sawm che a ni," an ti.

Serchhip ZPM chuan, Mizoram state a nih hnua political party pahnihin kum 30 chhung Mizoram an kaihruai chhungin Mizoram chu eng kawng­ah mah a intodelh lo tih sawiin, "Hausa an hausa tual tual a, rethei an rethei tual tual a, din­chhuahpuina tur tling tak tak si lo 'sem policy' hmangin, eng emaw dawn beiseia ring fân tawp hlei thei loin mipui an siam mek a ni," an ti a; Mizoram­a sor­kar tawh party-te chuan mipui retheihna den­chhenin an vote lei an tum mek tih an tarlang.

Mizoram sorkarin zu a zuar a, ruihhlo vangin ṭhalaite an thi mek zel nia sawiin Serchhip ZPM chuan, "Ration buhfai bûk a dik hlei thei lo a, hmasawnna hnathawh apiang­ YMA vilpui ngaiin a awm zel. Ram hruaitute'n an duh tihhlawhtlin nan ‘Kohhran kan ráwn dawn lo’ min tih khum a, ‘Zu zawrh hi kohhran ho ṭawngṭai chhanna a ni’ min tih khum thûl! Kan ram hi a damlo a, thihsualin a rûm mek a ni," an ti a; Mizoram chhan chhuak turin ZPM a ­piang ta tih an sawi a ni.