MNYF-in fehchhuah programme an buatsaih

Mizo National Youth Front (MNYF) headquarters chuan September 1, Inrinni khan Chanmari kâwnah fehchhuah programme an buatsaih a; MNYF vice president Lalremruata Chhangte-in kaihruaiin, MNYF president Lalrinawma, MLA, Lalruatkima, MLA leh councillor Laltlanzova Khiangte ten thu an sawi.

MNYF President chuan, NLUP leh NEDP-te chu Mizoram economy-in a ṭhat phah lo nia sawiin, "NLUP atan cheng vbc. 2800 an hmang tawh a, NEDP atan cheng vbc. 2000 an hmang tawh bawk a; a vaiin cheng vbc. 4800 hmang tawh mah se, kan ram economy-in a ṭhan phah lo. NLUP-a an hmalakna 90% chu agriculture kaihhnawih a ni a, mahse, agriculture lama kan thar chhuah a tlahniam thung," a ti.

MLA Lalruatkima chuan, NLUP leh NEDP chu sweet, a fûnna mawi taka tuam ang a nih thu sawiin, "Mipuite rethei takin siam ila, an retheihna denchhenin sum leh paiin vote kan lei mai dawn a ni tih hi an chángvawn a ni. NLUP an sem a, anni chuan a hlawhtling an ti a, mipui vote an hmuh theihna tur a niha sorkar theihna atana an hman phawt chuan anni chuan a hlawhtling an ti zel mai a ni," a ti. NLUP hnuaiah vawk note nuai chuang an sem chungin vawksaah kan intodelh lo a, ar note nuai 10 chuang an sem tawh laiin arsaah kan intodelh chuang lo niin a sawi.

Councillor Laltlanzova Khiangte chuan, Mizoram sorkarin SIPMIU chu sum siam nan an hmang nia sawiin, "Sorkarin Aizawla veng 83 awmah motor 50 chuang hret chauh an lei a, chu'ng motor pakhat cheng nuai 10 vela lei theih tur chu cheng nuai 20 velin an lei a, SIPMIU hi ram hruaitu tute emaw chuan sum siam nan an hmang a ni," a ti.