Ṭhenawm state leh rama remna siam turin Mizoram min mamawh - Chief Minister

Mizoram sorkar Tourism department leh Tripura Zo Kutpui Organizing Committee chuan Vanghmun, Tripura-ah ni thum awh tur Zo Kûtpui an  buatsaih mek a, nimin khan chief minister Zoramthanga'n a hmanpui. CM chuan, kan ṭhenawm state leh rama remna siam turin Mizoram an mamawh thu a sawi.

Chief Minister chuan, hnam inpumkhatna turin hmun tina Zo fate thawh leh beihnate a nêp lo tih sawiin, "Remna hi Mizoram hmasawn theih chhan pawimawh tak a ni. Remna sual chhuak tawh state kan ni a, remnain hmasawnna a thlen dan kan hria. Kan chhehvel state leh ṭhenawm rama remna siam turin Mizoram min mamawh a, heng zawng zawng hi mimal emaw pawl pa­khat avang chauh ni loin, Pathian kaihhruaina vang vek a ni," a ti.

Zoramthanga chuan, Mizo­ram chu Pathianin malsawmna tam tak a pek thu sawiin, "Mal­sawmna ruai chu mi tin, mi hausa leh mi retheite'n an kîl phâk theih tura chawi hniam chu kan hmabak a ni," a ti a; sorkar aṭangin leh pawl leh mimal tinte'n hma an lak tlan a pawimawh thu a sawi.

Zo fate inpumkhatna a pawi­mawh thu leh hmasawnna atan remna a pawimawh thu sawiin Zoramthanga chuan, Zâmpui tlangdunga Mizo chêngte chu an mamawh hrang hrangte tihhlawhtlin sak theih dan tur ngaihtuahsak a theihtawp chhuah a nih tur thu a puang.

Kût uaptu K Lalrinliana, minister of state chuan, kût hlimawm tak ruahman a ni chu lawmawm a tih thu a sawi a, "Khawi hmunah pawh awm ila, Zo hnahthlakte hi kan inkung­kaihna theihnghilh loa kan tihngheh zel a pawimawh," a ti.

Kut thlengtu Robert Romawia Royte, Tourism minister chuan, Zo Kûtpui chu Zo fate kal zelna tura méllung pawimawh tak a nih reng tawh tur thu sawiin, "Zo Kûtpuiin a tum chu - khawvel hmun hrang hranga Zo fate inunauna leh inpumkhatna a ngheh zual zel theihna tur a ni," a ti a; Mizote inpawhtawna an inpumkhat tlat chuan Mizoram chhung leh páwna awm zawng zawngin an hlâwkpui vek tur thu a sawi.

Inkhawm hi Zo Kûtpui Orga­nizing Committee chairman J Lalthangmawia'n a kaihruai a, Central YMA leh ZORO ai­­awhte pawhin thu an sawi. Kût hi Ningani khan ṭan a ni a, 'Inpum­khatna' tih thupui hmangin seminar buatsaih niin, L Keivom leh Rev. Dr Vanlalchhuana te chu resource person an ni.