Serchhip MJA leh Bawrhsap inkâwm

Serchhip bawrhsap thar Nazuk Kumar chuan nimin khan a pisaah Serchhip district MJA member-te a kâwm a, thawhhona ṭha tak an neih theih nan thawhpuiah a sáwm.

Nazuk Kumar chuan, chanchinbu­mite chu sorkar mit leh beng leh mipui hnena thu chhia a ṭha thlentu an nih avangin an pawimawh thu a sawi a, "Serchhip district enkawlna kawng tinrengah in thawhpuina kan mamawh a ni," tiin, thil thleng pawimawhte chu hrilha bengvàr ṭhin turin a ngen.

Bawrhsap pisa leh MJA-te'n thawh­hona ṭha tak an lo neih tawh ṭhin chu chhunzawm zel a duh thu sawiin DC chuan, hripui donaa an thawhho tawhnate chu fak tlak nia a hriat thu a sawi a; mipui tichî-âi zawnga thu léng darh ṭhin laka fihlîm turte leh thu dik hrilhtu nih tum tlat turin a chah bawk.

Serchhip MJA president Kapliana Pachuau chuan, Bawrhsapin lénga a sáwm chu lawmawm a tih thu a sawi a; an district hmasawnna atana hna a thawhnaah chanchinbumite'n ṭangkaina an nei a nih chuan puih an inhuam reng tih a hrilh.

Chanchinbumite hian Serchhip district-a hmasawnna hna thawh hrang hrangte chu fûr ruahtui tlâk hmaa chak taka thawh a nih theih nana ṭan lak a ṭula an hriat thu an sawi a; District Hospital lian leh changtlung zawk Serchhipin a mamawh hle tawha an hriat thute an sawi bawk.