LS MP-in rél kawng siam mek a tlawh

Lok Sabha MP C Lalrosanga chuan January 18, Thawhlehni khan Northern Frontier Railway (NFR)-in Khàmráng leh Sihhmui inkara rél kawng an siam mek a tlawh. MP chuan, Mizoram chhim lam thlenga survey tih tawh angin rél kawng kaltir tura hmalak tum a nih thu a sawi.

C Lalrosanga chuan, NFR hotute chu rim taka hna hautak tak an thawh avanga lawmthu hrilhin, "Sairang thlenga rél kawng siam hna hi thawh zawh a nih hnuah pawh Mizoram chhim lam thlenga survey lo tih tawh angin rél kawng kaltir tuma hmalak tum a ni," a ti.

Lok Sabha MP hian Khamrang rêl chawlhhmun tur aṭanga rél kawng kalna tur lei verh te, lei dawh mek te, Mualkhang leh Sairanga rêl chawlhhmun siam mekte enfiah a; NFR hotute chu hna an thawh dan a sawipui bawk.

NFR hotute chuan, harsatna hrang hrang an tawhte MP an lo hrilh a; rél kawng chu March 2024-a siam zawh hman an tum chu December 2023-ah zawh hman an beisei thu an sawi.

Rel kawng enkawlna kawnga consultant Hrangtawna pawhin rél kawng siam chungchangah hna thawh theih hun (working season) a rei loh avang leh zangnadawmna buaipui a ngaih ṭhin avangin duh angin hna thawh chak theih a nih loh thu a sawi a ni.