DC sawn dana lungawi lo Champhaiin Republic Day boycott an tum
Champhai District NGO Coordination Committee chuan, Champhai bawrhsap Maria CT Zuali sawnna thupek sût tura an phût chu Mizoram sorkarin a tihhlawhtlin loh avangin January 26, 2022 khian Champhai khawpuiah total bandh huaihawt a, Republic Day boycott an rél. Ni dangah dawr khâr, kawngzawh leh sorkar pisa khârte an tum bawk.
Champhai District Joint NGO hruaitute January 14, 2022-a YMA Sub-Hqrs, Champhai pisaa ṭhukhawm chuan bawrhsap Maria CT Zuali transfer order, January 13, 2022-a tihchhuah chu January 18, 2022 ral hmaa sût turin Mizoram sorkar an phût a; transfer order an hâl nghal.
Mizoram sorkarin January 18 ral hnuah pawh transfer order a sût loh avangin Champhai Joint NGO hruaitute chu nimin chhun khan an ṭhukhawm leh a, sorkar laka lungawi lohna lantir dan tur an rêl a ni.
Nimina ṭhutkhawm hnua thuchhuah an siamah NGO-te chuan, “Champhaia NGO hrang hrang ṭhukhawmin Champhai DC sawn chhuak lo tura Mizoram sorkar a ngenna vawiin thlenga tihhhlawhtlin a la ni lo hi pawi kan ti tak zet a ni,” an ti.
Champhai District Joint NGO chuan, an thil phût tihhlawhtlin a nih loh avangin lungawi lohna lantir dan tur an ruahman. An ruahman dan chuan, naktuk January 21, Zirtawpni hian Champhai khawpuia dawr zawng zawng khâr tur a ni a, January 24, Thawhṭanniah kawngzawh huaihawt a ni ang.
January 25, Thawhlehniah sorkar pisa zawng zawng khâr an tum a; January 26, Nilainiah total bandh huaihawt a, Republic Day boycott an tum bawk.
An hmalakna turah hian NGO-te ṭhukhawm chuan, duty detailment mawh la turin MZP Headquarters, Champhai an ruat a, ruahmanna a ṭul ang zela siam turin NGO Coordination Committee leh MZP an ruat a ni.
Champhai Joint NGO chuan, “Sorkar laka kan thil ngiatte Champhai district mipui tan a ni tih hriaa hma min lakpui turin Champhai district chhunga MLA-te kan phût a ni,” an ti a; lungawi lohna lantirna tura an ruahmante an kalpui hnu pawha DC transfer order chu sût a la nih loh chuan na zawka hma an lâk zel tur thu an tarlang.
An hmalakna chu DC transfer ngawr ngawr a ni lo tih tarlangin NGO-te chuan, “Dan loa thil titute leh dikna indona a nih avang leh, dik lo taka sumdawngtute kuta kan khawtlang, ram leh hnam tlu lut mek chhanchhuahna tur a nih avangin Champhai district mipui leh Mizo mipui zawng zawngte kan hmalakna min thláwp turin kan sáwm a ni,” an ti.
Champhai NGO ruahmanna
21.1.2022: Champhai khawpuia dawr zawng zawng khâr
24.1.2022: Kawngzawh
25.1.2022: Sorkar pisa zawng zawng khâr
26.1.2022: Total bandh huaihawt leh Republic Day boycott