KHAWTHLIR

BCM hruaitu thlang
Baptist Church of Mizoram (BCM) Assembly Executive Committee nimina Lunglei Serkawna ṭhukhawm chuan kum 2022-2025 chhunga BCM Headquarters hruaitu tur an thlang. General secretary-ah Rev. R Lalbiakliana, assistant general secretary (i/c Mission)-ah Rev. R Lalthanmawia leh assistant general secretary (i/c Service)-ah Rev. R Lalnunzira te an thlang. Hruaitu an thlante hi BCM Assembly-in a pawmpui leh a la ngai dawn a ni. President atan chuan Rev. Dr Zolawma nikum khan an lo thlang tawh a ni.

Thisen pe
Kolasib Diakkawn Branch YMA chuan nimin khan thisen pek huaihawtin, Kolasib District Hospital-ah thisen unit 30 an pe a, petute mipa 26 leh hmeichhia pali an ni.

Aizawl DC pisa
Aizawl Bawrhsap Pisapui hmuna DC pisa tura ruahman lailâwk, District Emergency Operation Centre (DEOC) building chu Aizawl bawrhsap Dr Lalhriatzuali Ralte chuan January 18, Thawhlehni aṭang khan a luah ṭan. Aizawl DC hmu duh leh be duh tan https://appointment.mizoram.go... ah appointment tih lâwk tur a ni.

CM hoin thukhawmṬ
Horticulture Development Board chu nimin khan an chairman Zoramthanga, chief minister hoin Chief Minister’s Office-ah an ṭhu a, Mizoramah hlâwk zawka thar theih hrang hrang (horticulture product) thlante an thlirho bakah, bung hrang hranga target siam dan turte an sawiho. Covid-19 lêng avangin duh anga hmalak theih a nih loh thu leh harsatnate an sawi a; tih theih awm apiangah theihtawpa hmalak zui zel ni se, an ti.

Vaccine dose 13,94,600 pe tawh
January 18, Thawhlehni thleng khan Mizoramah mi 7,80,676 hnenah Covid-19 vaccine dose 13,94,600 pek a ni tawh. Vaccine la tawh mi 7,80,676 zinga mi 6,05,147-in dose hnihna an la tawh a, mi 8,777-in precautionary dose an la tawh bawk. January 18 bikah chuan vaccine dose khatna 3,582, dose hnihna 1,800 leh precautionary dose 1,078, a vaiin dose 6,460 pek a ni.