Kuhva tawlh rûk danna tur checkgate Siam turin Central YMA-in CM an ngen

Central YMA office bearer-te chuan nimin khan chief minister Zoramthanga a pisaah an kâwm a, dan loa kuhva tawlh rûk danna turin checkgate mumal tak siam turin an ngen. Chief Minister chuan, Myanmar aṭanga Mizorama dan loa kuhva tawlh rûk tihtawp a duh thu a lo hrilh.

Vanglaini palai zawhna chhangin Central YMA president R Lalngheta chuan, Chief Minister-a an thu thlen pui ber chu khawchhak lam aṭanga dan loa kuhva tawlh rûk tihtawp chungchang a nih thu a sawi a, “Kuhva tawlh rûk danna turin checkgate mumal tak siam tur leh a chak thei ang bera hma la turin kan ngen a ni,” a ti.

CYMA thuchhuakin a tarlan danin, CM Zoramthanga chuan, khawchhak lam aṭanga Mizorama dan loa kuhva tawlh rûk chu a rang thei ang bera tihtawp a duh thu leh sorkar leh YMA ṭan rual a ṭul thu CYMA hruaitute a lo hrilh a ni.

Chief Minister chuan, CYMA-in kuhva tawlh rûk chungchang zirchianna a kalpui mek chu lawmawm a tih thu sawiin, hmalak dan tur rawtna an neih hunah theihtawpa bawhzui a ṭul thu a sawi a; kuhva tawlh rûk donaah sorkar, political party-te leh tlawmngai pawl dangte ṭan rual a ṭul thu a sawi bawk.

CYMA president R Lalngheta chuan, CYMA-in dan loa kuhva tawlh rûk chungchang zirchianna a kalpui mek thu sawiin, “Aizawl lamah chuan kan zo thawkhat tawh a, January 26, 2022 hian Champhai lamah kal leh an tum,” a ti. Kuhva tawlh rûk zir chiangtute hi CYMA assistant secretary Prof. Malsawmliana’n a kaihruai a ni.

CM Zoramthanga hmuhnaah hian President hoin CYMA office bearer panga an kal a; thil pawimawh dangte an sawipui bawk a ni.