RUSA-a thawkte‘n hlawh an lâk theih nan HRD-ah DO letter thawn a ni - HTE Minister

Aizawl City College Joint Students‘ Union (ACCJSU) chuan nimin khan Vaivakawna Cultural Centre-ah Meet an hmang a, khuallian Higher & Technical Education minister Dr R Lalthangliana chuan, RUSA hnuaia thawkte‘n hlawh an lâk theih nan Ministry of Human Resource Development (HRD)-ah kar kal ta khan DO letter a thawn thu a sawi.

Dr R Lalthangliana chuan, college zirtirtu post ruak a theih anga tam an hnawh khah thu sawiin,"Kum kal ta lamah RUSA hnuaiah college zirtirtu 70 chuang post hnawh khah a ni. An hlawh tur hi Ministry of HRD aṭanga lo kal tur a ni a, anni lam hian an tih tur an hlen theih nan kar kal ta khan DO letter thawn a ni a, hun rei lo te chhunga chinfel a nih a rinawm," a ti.

RUSA hnuaiah India ramah zirtirtu 300 lak a ni a, Mizoramin 70 chuang a chang tih sawiin Minister chuan, "Anni hi awm lo se kal a buaithlak viauin a rinawm. Covid avanga ramin sum leh pai dinhmunah harsatna a tawh a vangin a ngheta thawk tur lâk mai chu hun a la duh hlek ang," a ti a; casual teacher 100 vel lak a nih thu a sawi.

HTE Minister chuan, sorkarin a hun takah zirlaite scholarship pek a tum thu te, zirlaite hamṭhatna leh hmasawnna turin MYC-in ṭan a lak thu te, college infrastructure tihchangtlun nan hmun âwl leh campus zau neiteah hostel sak belh a nih theih nan HRD Ministry a biak tawh thute a sawi bawk.

ACCJSU Meet-ah hian Mizoram Cooperative Apex Bank chairman T Lalmuanpuii khualzahawm a ni.

Hetihlai hian HTE Minister hian January 6, 2022 khan Ministry of Finance-in RUSA hnuaia zirtirtute hlawh tur a pek chhuah theih nan Mizoram sorkarin inkaihhruaina thar phût ang 99% vel a peih tawh thu a lo sawi tawh a ni.