College final semester zirlaite class pangngai kaltir turin CM ngen

MZP General Headquarters, Aizawl hruaitute leh Aizawla college students union hruaitute chuan nimin khan MZP president Lalnunmawia Pautu hoin chief minister Zoramthanga a pisaah an kâwm a; college-a final semester zirlaite tal class pangngaia kaltir turin an ngen.

Zirlai pawl hruaitute chuan, zirlaite hmakhua tur ngaihtuahin, online ringawta class an kal chu ṭha lo an tih thu sawiin, final semester zirlaite tal chu dan pangngaia class kaltir turin Chief Minister an ngen a; Mizoram sorkar hnuaia College Students’ Study Fund beitham tak chu tipung tur leh, Higher & Technical Education department-ah director atan Mizo dah turin an ngen bawk.

Heng bakah hian, ZOFEST 2022, Vaṭhuampuia RD Block dah tura ngenna, ramria kut hnathawktute harsatna chungchang leh Thangram Indigenious People’s Movement chungchangte an thlen bawk a ni.