Serchhip damdawi-ina thil thleng Chhui tura ruatin a chhui zo tawh

Serchhip District Hospital-a mi pahnih thihna chungchang chhui chiang tura ruat Serchhip DC kal chhuak ta Kumar Abhishek chuan a chhui chianna report sorkarah a thehlut tawh.

Vanglaini palai zawhna chhangin Health secretary R Lalramnghaka chuan, Serchhip District Hospital-a thil thleng chungchanga magisterial inquiry titu Kumar Abhishek-a’n report a thehluh tawh thu a sawi a, “A ṭul anga bawhzuia zir chian turin process mek a ni,” a ti.

Tarlan tawh angin, Serchhip District Hospital-a nausen piang hlim thihna leh raicheha nu thihna chungchang chhui chiang turin Serchhip Ṭhalai Pawl (SṬP) chuan December 6, 2021 khan Health minister Dr R Lalthangliana, bialtu MLA Lalduhoma leh Serchhip DC-te hnenah ngenna an thlen.

SṬP tarlan danin, October 29, 2021 tlai dar 3:30 khan Vanlaldinpuii w/o Robert K Vanlalchhuanga, Sialsir khuain Serchhip District Hospital-a naute a hrin chu a tûk October 30 zan dar 8:30-ah a thi. Nausen thi hi damdawi-ina thawktute’n an ngaihsak ṭha tâwk lo nia an hriat thu, a chhungte’n an thehdarh bakah, nausen na tuar lai video social media-ah thehdarh a ni.

Sialsir nausén thih aṭanga ni 34-na, December 3, 2021 zan khan Serchhip District Hospital-ah vêk Malsawmkimi w/o Zaithankima, Tlangpui khua chu nau chungah a thi a, a nau hrin pawh a thi a ni. He thihna thleng chungchangah hian mitthi chhungte chuan thawktute inthlahdah vangah ngaiin, an rilru a nat thu an sawi.