Samagra Shiksha leh SCERT-a thawkte Hlawh bat a awm lo - Education Minister

School Education minister Lalchhandama Ralte chuan, Samagra Shiksha, Mizoram hnuaia thawk mi 5,000 velte hlawh leh SCERT hnuaia thawktute hlawh bat nei loin department-in a pek theih thu a sawi.

Samagra Shiksha, Mizoram hmachhawp leh Annual Work Plan & Budget 2022-23 siam dan tur ruangám nimina thlirhonaah Lalchhandama Ralte chuan, "Samagra Shiksha hnuaia thawk mi 5,000 zette hlawh leh SCERT hnuaia thawktute hlawh bat nei loin department-in a pe thei a, state matching share pek theih loh avanga central share hmuh theih loh a awm lo a, Finance-ah pawh sum táng a awm lo," a ti.

Lalchhandama Ralte chuan, Samagra Shiksha hnuaia thawkte hlawh a ngaia a ding rei lutuk chu chàwi sàn dan awm thei se a duh thu leh, plan siam turah thawktute hamṭhatna lam zeh tel theih dan kawng awm se a duh thu a sawi.

School Education Minister chuan, Samagra Shiksha plan siam turah rintlak data nen siam ni se a duh thu sawiin, "Hripui léng avanga state hrang hrangin sum leh paia harsatna an tawh mekna karah Mizoram School Education department chuan thawktute inpekna leh thawhrimna avangin hmasawnna a hmu chho zel a ni," a ti.

Ṭhutkhawmah hian National Education Policy(NEP) 2020 mila ruahman a ṭul dan te, tun hmaa sorkar sikula naupang kum 6 an tlin hnua lut thei chauh chu NEP 2020-in kum 3 chin a rìn luh tâk dan leh naupangin zirna bul a ṭanna chu ngaih pawimawh a nih dante sawiho a ni.

Naupang kum 3-4 inkarte chu anganwadi-in an enkawl ang a, kum 5 an tlinin sikul pangngaiah an lut tawh dawn tih tarlan a ni a, chuvang chuan class room leh thil dangte mamawh belh dante sawiho a ni a; secondary school tan naupangin subject har an tih science leh mathematics zirlaibute chu English chauha ziak loin, state ṭhenkhata an kalpui angin English leh Mizo ṭawnga ziah dan tur ruahman dan turte sawiho a ni bawk.

Ṭhutkhawmah hian Human Resource Deve­lopment Board vice chairman L Thangmawia, MLA, School Educa­tion secretary Dr Lalzir­­mawia Chhangte leh director James Lalrin­­chhana, SCERT director Laldawngliani Chawngthu, MBSE chairman JH Zorem­thanga, Samagra Shiksha state project director Lalhmachhuana leh officer dangte an tel a ni.