Covid-19 vangin 576 thi tawh
Nimin khan tlai dar 5 thlengin Covid-19 vangin mi pakhat a thi a, January 18, Thawhlehni zan khan mi pahnih an thi bawk. Mizoramah hripui vangin mi 576 an thi tawh a, kumin January thla bikah mi 30 an thi tawh.
January 18, Thawhlehni zan dar 9:40 khan Thanglawta (65), Bilkhawthlir chu hripui vangin State Refferal Hospital-ah a thi a, natna dang nei tel a ni. Covid-19 vei a ni tih December 29, 2021 khan finfiah a ni a, SRH-ah dah luh nghal a ni.
Kapsanga (78), Chhiahtlang, Serchhip district pawh Thawhlehni zan dar 9:45 khan SRH-ah a thi a; Covid-19 vei a ni tih December 29 khan hmuh chhuah niin, SRH-ah enkawl nghal a nih thu sorkar thuchhuakin a tarlang.
Nimin chawhnu dar 1:15 khan B Sarung (5), Bawngva, Mamit district chu Covid-19 vangin a thi a; Covid-19 positive a ni tih nimin khan finfiah a ni a, SRH-a enkawl tura kalpui a nih laiin kawng lakah a thi a ni.