Sainik School, Chhingchhip hnena sum pe thuai turin MPCC-in sorkar an ngen

Mizoram Pradesh Congress Committee (MPCC) chuan thuchhuah siamin, Sainik School, Chhingchhipin sikul hmasawnna atana hna thawhna tur sum Mizoram sorkar aṭanga hun rei tak a dawng tawh lo chu pawi an tih thu leh, sum pe thuai tura Mizoram sorkar an ngen thu an tarlang.

MPCC chuan, January 18, Thawhlehni khan Sainik School principal Wg.Cdr Sharul Hameed leh vice principal Maj. S Kalyan ten Governor Hari Babu Kambhampati an hmu a, Mizoram sorkar aṭangin Sainik School hmunhma chei leh siamṭhat hna thawhna tur sum an dawn ngai tawh loh thu an thlen tih an sawi a, "Sikul hmasawnnain nasa taka a tawrh dawn avangin an mamawh ang sum pe thuai turin Mizoram sorkar kan ngen a ni," an ti.

Sainik School din a nih theih nan Congress sorkarin theihtawp chhuahin hma a la tih sawiin MPCC chuan, "Sikul chhung hmunhma chei leh siam hna hi state sorkar kut a nih avangin sum leh pai mamawh pawh Sainik School hian Mizoram sorkar aṭangin a dawng ngei tur a ni," an ti a; chatlak loa sum pe chhunzawm turin Mizoram sorkar an ngen.

Congress party chuan, Sainik School chu Mizo ṭhalaite tan a hlu hle tih sawiin, "Mizo ṭhalai tam tak sipaia an ṭan theihna tura inchherna hmun a nih bakah, hna zahawm dang tam tak an thawh theihna atana inzirna hmun tur, zirna-in ṭha a nih avangin state sorkarin a pek tur sum a rang lama ruahman turin Mizoram sorkar kan phût a ni," an ti.

MNF sorkar chu an duhsak zawngte vûr nana Mizoram hmasawnna tur ni loa hmalakna tam tak a neih mekte chawlhsan a, Mizo ṭhalaite tana rotling tur buaipui tawh zawk tura an beisei thu an sawi bawk.

MPCC tarlan danin, Sainik School, Chhingchhip hi kum 2017-a din niin, kum 2018 khan India rama Sainik School 33 awm zinga hmeichhe luh theihna hmasa ber a ni a; hmeichhia an luh ve theihna turin Lal Thanhawla chuan chief minister a nih lai, November 6, 2017 khan Union Home minister Rajnath Singh hnenah ngenna lehkha a thawn a ni.