January-ah hripui vei mi 13,405 hmu tawh

January 18, Thawhlehni khan Mizoramah Covid-19 vei mi 1,312 hmuh chhuah a ni a, kumin January thla chhungin mi 13,405 hmuh a ni tawh. Nimin khan hripui vei dam tawh mi 918 chhuahtir an ni a, mi pakhat a thi.

Covid-19 vei hmuh thar mi 1,312-te chu mipa 645 leh hmeichhia 667 an ni a; ZMC laboratory-a hmuh chhuah 191, TrueNAT hmanga hmuh 68, RAT hmanga hmuh 1,012 leh FIA hmanga hmuh 41 a ni. An zinga mi 752-in symptom an nei a, positivity rate chu 16.02% a ni.

Sample endikna district 11 zingah positivity percentage 10% aia a sànna district pasarih a awm a, a sànna ber Aizawl district-ah 28.99% a ni a; 10% aia sanna district dangte chu - Mamitah 19.43%, Hnahthialah 14.29%, Lungleiah 13.42%, Khawzawlah 12.71%, Saitualah 12.64% leh Champhaiah 10.83% a ni.

IPR tarlan danin, Covid-19 positive hmuh tamna thingtlang khua leh Aizawla vengte chu - eCentric Solutions, Falkawnah 22, Sawlengah 44, Hualtu-ah 25, Chhawrtuiah 22 leh Sailamah 20-te a ni a; Lunglei district-a Ṭhaizawl refugee camp-a awm zingah mi paruk hmuh a ni bawk.

Lengpui Airport-ah state páwn aṭanga rawn lut zingah Covid-19 positive mi 40 hmuh a ni a; screening point dang - Kanhmunah 23, Tuivaiah pariat, Vairengteah pali leh Bairabi-ah pakhat hmuh a ni.

Nimin tlai dar 5 thleng khan hripui vei dam tawh mi 918 chhuahtir an ni a; district tina chhuak zat chu - Khawzawlah 286, Aizawlah 125, Mamitah 122, Serchhipah 116, Saitualah 74, Lungleiah 52, Lawngtlaiah 50, Hnahthialah 45, Champhaiah 30 leh, Siaha leh Kolasib-ah pakua ve ve a ni.

IDSP record angin, Mizoramah Covid-19 vei 1,55,070 hmuh chhuah a ni tawh a, mipa 74,271 leh hmeichhia 80,799 an ni a, mipa aiin hmeichhia 6,528-in an tam zawk. Nimin tlai dar 5 thleng khan mi 1,46,403 (94.41%) chhuahtir an ni tawh a, mi 576 (0.37%) thi tawhin, enkawl mek mi 8,091 (5.22%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,55,070 chu mi 1,000 zelah hripui vei mi 141 an awm ang a ni a; mi 1,00,000 zela Covid-19 vangin mi 52 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 18, 2021 thlenga swab sample endik tawh 15,96,913 aṭanga RT-PCR hmanga endik zat percentage chu 20.99 a ni a, RAT hmanga endik zat chu 73.22% a tling.