Ramrikawn kudam vanga harasatna Sut kian a ni dawn - Rajya Sabha MP

State Consultative Committee on Food Corporation of India (FCI) chairman Ronald Sapa Tlau, Rajya Sabha MP chuan, Ramrikawn, Tanhrila FCI kudam a awm vanga harsatna awm ṭhin chu sutkian a nih dawn tih a sawi.

Ronald Sapa Tlau hian nimin khan Aijal Club-ah thuthar thehdarhtute a kâwm a; FCI kudam sakna atan FCI hnenah Mizoram sorkarin Sairang Dintharah ram a pek thu sawiin, "Ram hi kum 99 atan FCI kutah hlan a ni. FCI chuan Central PWD hnenah construction ti turin lehkha a ziak tawh a, DPR-te a chhuak ang a, hna thawh ṭan a ni ang. CPWD hi a rang lama hma la turin kan ngen tawh," a ti.

Rajya Sabha MP chuan, Sairanga FCI kudam sak tur chu Ramrikawna kudam aia a leta lian a nih dawn thu sawiin, "Sairanga kudam sak zawh a nih hunah pawhin Ramrikawn kudam hi kan hluihlâwn dawn chuang lo. Eng emaw thulh atan buhfai tlem azawng kan dah ang," a ti a; Sairang kudam peih a nih hunah chuan Ramrikawna FCI kudam vanga harsatna thleng ṭhin a reh tawh tur thu a sawi.

District khawpui tinah FCI-in kudam neih a duh thu sawiin Ronald Sapa chuan, "Chumi tur atan chu hmalak mek a ni a, a ram turte min pek a ṭul. Supply department nen thawhhona ṭha neih a ngai. A hmasa ber atan Champhaiah kudam dah a ṭul a, chumi dawtah chuan Siaha ngaih pawimawh leh a ngai," a ti.

Ronalda Sapa Tlau chuan, Mizoramah FCI-in buhfai an chhêk khâwl tam tâwk thu sawiin, "Kan stock theih zat chu metric ton 25,490 a ni a, September 1, 2018 khan metric ton 18,695 buhfai stock a awm a, hei hi 73.35% a ni," a ti a; an buhfai chhêk khâwl dinhmun chu a ṭha tawk hlea an ngaih thu a sawi.

Rajya Sabha MP chuan, storage loss (dah khawmnaa hloh/bothlau) tihtlem tumin hma an lak zel thu a sawi a, "FCI-in storage loss-a a palzam theih chin chu 1.11% a ni a, chumi hnuaiah vek chuan Mizoram chu kan awm. Buhfai bothlau a awm ve lo a, hei hi department lam inpekna vang a ni. State dangah chuan buhfai an tihchingpen nasat avangin storage loss a sang thei hle," a ti.

Mizoramah FCI staff an indaih loh thu sawiin Ronald Sapa Tlau chuan, "Staff neih belh turin hmalak a ni a, mahse, all India level anga lak a, a ṭul chuan state dangah pawh sawn theih tura lak tum a ni. Hei hi ṭha kan ti lo a, hnam dang lak an nih chuan rei lote an awm ang a, chhuah dan an zawng leh ṭhin," a ti a; a bik takin 4th. grade-ah khawtual mi ngei lak dan tur an dap mek thu a sawi.