NLUP sawifiahna peih a ni tawh

NLUP Implementing Board (NIB) chuan Gauhati High Court, Aizawl Bench-in NLUP chungchanga insawi­fiah tura Mizoram sorkar a hriattir angin, insawifiahna tur an peih tawh. Hetih lai hian, insawifiahna hi Court-ah thehluh a la ni loa thu dawn a ni.

NIB aṭanga thu dawn danin, NLUP chungchanga insawifiahna tur hi Secretariat lamah thawn a ni tawh a, Secretariat-ah enfiah a nih hnuah Law & Judicial department-ah thawn leh a ni ang a, chumi hnuah sorkar ukilte hnenah Court-a thehluh tura pek a ni ang.

Tarlan tawh angin, NLUP sem dan chungchangah Gauhati High Court, Aizawl Bench-ah Vanramchhuangi, Chaltlang-in PIL a thehlut a, Court chuan August 3, 2018 khan order tichhuakin, NLUP chu thla li chhung sem rih loh turin a ti a ni.

High Court order-a a lan danin, NLUP dawng tur thlan danah guidelines (inkaihhruaina) siam a nih leh nih loh zawh a nih chungchangah sorkar ukil chuan insawifiahna hun pe turin Court a dil a, a dil angin Court-in insawifiahna hun a pe. High Court chuan NLUP chungchang hi order a chhuah aṭanga chawlhkar li hnua ngaihtuah leh turin a dah a, tunah hian order chhuah a nih aṭangin chawlhkar li a liam tawh a ni.