Kan sorkar veleh ruihhloin a tihbuaite tan Emergency programme kan siam dawn - Zorama

MNF president Zoramthanga chuan nimin khan Mizo Hnam Runa inkhawmah thu sawiin, zu leh ruihhloin Mizoram a rûn mek chu pawi a tih thu a sawi a, "Zu leh drugs-in a tihbuaite enkawla chhanchhuahna tur emergency programme kan sorkar veleh kan buatsaih dawn," a ti.

Zoramthanga chuan, zu leh ruihhloin a bâwih mekte enkawl chu MNF sorkar hunah hna puiah an nei dawn thu sawiin, "Congress sorkarin mi 1,000 aia tam a tihhlumna zu zawrh hi kan titawp dawn tih ka sawi nawn duh a, zu zuar lo thei loa awm mi harsa zawkte tan zu zawrh aia hlâwk leh nuam zawk, eizawnna nuam leh hlâwk kan siamsak dawn a ni," a ti a; chutianga ti tur chuan sorkarna an siam ngei a rin thu a sawi.

MNF President chuan, naupang sikul kal hun tihdanglam avangin naupang hriselnain a tuar nia an hriat thu leh mi tam tak nunphung a tibuai nia an hriat thu a sawi a, "MNF kan sorkar chuan sikul kal hun hi kan thlak danglam leh dawn a ni," a ti.

MNF thuchhuah chuan, nimina an party piasaa inkhawmah hian Central YMA vice president hlui Vanlalrema Rokhum leh voter eng emaw zat chu MNF party-ah Zoramthanga'n a lawm lut niin an tarlang.