Zirna hi politics khelhna atan Kan hmang ve lo - H Rohluna

School Education minister H Rohluna chuan nimin khan Kolasib Saidana Kolasib DIET building thar a hawng a, zirna (education) chu politics khelhna atan an hman ve loh thu a sawi.

Education Minister lo ni tawh, Education Minister ni tlaka amah ngai lotu an awm thu sawiin H Rohluna, "Education Minister lo ni tawh hian, eng ngati nge Education Minister a nih lai khan Mizoram education a siamṭhat mai loh. Keini chuan education hi politics khelhna atan hman kan phal ve loa, sorkar hmasa kihhnawk avangin kan education hian hma a sawn hlei thei lo a ni," a ti.

H Rohluna chuan, DIET-a thawk zirtirtute chu hna pawimawh tak chelh an ni tih sawiin, "An zirtir chhuahte quality-ah Mizoram zirna thui tak a innghat a, inthladah a thiang lo," a ti a; sorkarin a phâk tâwkin zirna hmunhmá leh kalphung ṭha a kalpui a, zirna ti ṭha turin DIET aṭanga bul ṭan a ngaih thu a sawi.

Education Minister tarlan dan­in, Mizoram sorkarin NEDP aṭangin Educational Infrastructure (zirtirtu quarters leh sikul building) thawm ṭhat nan cheng nuai 1000 a dah a ni.

Hawnna inkhawmah hian Kolasib bialtu MLA PC Zoram Sangliana pawhin thu sawiin, Kolasib DIET building thar chuan Kolasib district-a zirnaah hmasawnna a thlen ngei a beisei thu a sawi a ni.

Kolasib DIET hi March 2015-a sak ṭan a ni a, cheng nuai 223.46 sénga sak a ni. Square metre 736.78-a zau niin, chhâwng thum a ni a, a satu contractor chu Liankungi, Saitual a ni.